Awaze bihar
Related Articles
جے پور، 18 نومبر (یو این آئی) راجستھان میں کانگریس کے ریاستی صدر گووند سنگھ ڈوٹاسرا نے ہے کہ پارٹی لیڈر راہل گاندھی کی بھارت جوڑو یاترا ریاست میں تاریخی ثابت ہو گی اور کانگریس اس کے ذریعے ریاست میں ایک نیا باب لکھے گی، جبکہ یہ پورے ہندوستان میں گیم چینجر ثابت ہوگی۔ مسٹر ڈوٹاسارا نے آج یہاں راجستھان میں یاترا کو کامیاب بنانے کے لئے وزیر اعلی کی رہائش گاہ پر منعقدہ میٹنگ کے بعد پریس کانفرنس سے خطاب کرتے ہوئے یہ بات کہی۔ انہوں نے کہا کہ راجستھان میں بھارت جوڑو یاترا تاریخی ہوگی کیونکہ مسٹر راہل گاندھی اقتدار اور سیاست سے اوپر اٹھ کر ملک کے غریب عوام کو طاقت دینے اور ان کی آواز بننے کی تپسیا کر رہے ہیں۔ ایک سوال کے جواب میں انہوں نے کہا کہ یہ یاترا نہ صرف راجستھان بلکہ پورے ہندوستان میں گیم چینجر ثابت ہوگی۔
انہوں نے کہا کہ ریاست کے عوام مسٹر راہل گاندھی کو سننے کا بے صبری سے انتظار کر رہے ہیں۔ انہوں نے کہا کہ بھارت جوڑو یاترا نے بی جے پی کو جھٹکا دیا ہے کیونکہ بی جے پی نے جو ان کی شبیہ کو داغدار کرنے کی کوشش کی تھی ہو ناکام ثابت ہوئی اور مسٹر راہل گاندھی کی سچائی دنیا کے سامنے آ گئی ہے اور عوام نے دیکھا ہے کہ اتنے بہادر، صبر کرنے والے اور محنتی لوگ دنیا میں نایاب ہیں۔ مسٹر ڈوٹاسرا نے کہا کہ جھوٹ اور کارپوریٹس کے پیسے کے بل بوتے پر اقتدار میں آنے والی بی جے پی ملک کے عوام کے سامنے بے نقاب ہو چکی ہے اور عوام سمجھ چکے ہیں کہ بی جے پی اقتدار کی خاطر کسی بھی حد تک جا سکتی ہے ۔
انہوں نے دعویٰ کیا کہ کانگریس بھارت جوڑو یاترا کے ذریعے راجستھان میں ایک نیا باب لکھے گی اور تمام کانگریسی مل کر سال 2023 میں ریاست میں دوبارہ کانگریس کی حکومت بنائیں گے اور اگلے سال 2024 میں وہ مرکز سے مودی حکومت کو جڑ سے اکھاڑ پھینکیں گے۔ انہوں نے کہا کہ بھارت جوڑو یاترا کے لئے تمام کانگریسیوں میں جوش و خروش کا ماحول ہے اور مسٹر راہل گاندھی جس مقصد کے ساتھ یاترا نکال رہے ہیں وہ ملک کے لئے اہم ہے کیونکہ مرکزی حکومت نے جس طرح کے حالات پیدا کئے ہیں۔ آج ملک میں بھائی بھائی سے لڑ رہا ہے، خوف کا ماحول بنایا جا رہا ہے، ڈرا دھمکا کر جھوٹے مقدمے درج کیے جا رہے ہیں، اپوزیشن لیڈروں کی آواز کو دبانے کے لیے آئینی اداروں کا غلط استعمال کیا جا رہا ہے اور انہیں مرکزی حکومت کی غلط پالیسیوں سے اختلاف کرنے والوں کے خلاف استعمال کیا جا رہا ہے۔
مسٹر ڈوٹاسرا نے کہا کہ بھارت جوڑو یاترا میں حصہ لینے والے ریاستی مسافروں کا انتخاب ضلع اور بلاک کانگریس کمیٹیوں کے ذریعے کیا جائے گا، جو راجستھان سے شروع ہونے والی تقریباً 521 کلومیٹر کی یاترا میں شامل ہوں گے۔
انہوں نے کہا کہ سماج کے تمام طبقات جیسے وکلاء، ڈاکٹرس، سی اے، کسان، طلباء بھارت جوڑو یاترا میں حصہ لیں گے۔ انہوں نے کہا کہ یاترا کے دوران ریاست کے تمام اضلاع میں علامتی یاترا نکالی جائیں گی اور تمام گاؤں اور قصبوں میں ایل ای ڈی کے ذریعے بھارت جوڑو یاترا کا لائیو ٹیلی کاسٹ کیا جائے گا۔ انہوں نے کہا کہ ریاست کے تمام ضلعی سطح پر کوآرڈینیشن کمیٹیاں تشکیل دی جائیں گی اور ضلع صدر اپنے ضلع کے سرکردہ کانگریسیوں کی میٹنگ کر کے بھارت جوڑو یاترا میں حصہ لینے کا پروگرام تیار کرکے ریاستی کانگریس ہیڈکوارٹر کو مطلع کریں گے۔
مسٹر ڈوٹاسارا نے کہا کہ بھارت جوڑو یاترا مدھیہ پردیش سے قومی شاہراہ پر ضلع جھالاواڑ سے راجستھان میں داخل ہوگی اور کوٹہ، بنڈی، سوائی مادھوپور، دوسہ سے ہوتی ہوئی الور کے ملاکھیڑا پہنچے گی، جہاں مسٹر راہل گاندھی کی ایک بڑی میٹنگ کا راجستھان پردیش کانگریس کمیٹی کی طرف سے اہتمام کیا جائے گا۔ انہوں نے کہا کہ بھارت جوڑو یاترا کے شام کے اجلاس کے بعد روزانہ سڑکوں پر جلسے ہوں گے جس میں آٹھ سے دس ہزار لوگ شرکت کریں گے۔ انہوں نے کہا کہ 25 نومبر کو وہ خود جھالاواڑ سے ہریانہ سرحد تک بھارت جوڑو یاترا کے پورے روٹ کا سفر کریں گے اور یاترا کے روٹ پر پڑنے والی تمام ضلع اور بلاک کانگریس کمیٹیوں کی تیاریوں کا جائزہ لیں گے۔
قبل ازیں انہوں نے بتایا کہ مسٹر راہل گاندھی کی قیادت میں ساڑھے تین ہزار کلومیٹر سے زائد طویل بھارت جوڑو یاترا کے راجستھان مرحلے کی تیاریوں کے سلسلے میں وزیر اعلیٰ کی رہائش گاہ پر ریاست کے سرکردہ کانگریسیوں کی میٹنگ ہوئی جس میں وزیر اعلیٰ اشوک گہلوت، ریاستی ایم ایل اے، ایم ایل اے کے امیدوار، ایم پی، ایم پی امیدوار، ریاستی کانگریس کمیٹی کے عہدیدار، موجودہ/سبکدوش ہونے والے ضلعی صدور، کارپوریشنوں/بورڈوں کے صدور، فرنٹ تنظیموں کے ریاستی صدور سمیت تمام ممتاز شخصیات موجود تھے۔ انہوں نے کہا کہ راجستھان میں بھارت جوڑو یاترا کی آمد کے بعد ریاست میں یاترا کو کامیاب بنانے کی تیاریوں اور ذمہ داری فراہم کرنے پر تبادلہ خیال کیا گیا۔
