پٹنہ، 3 اکتوبر:(اے بی این ) وزیر اعلیٰ سمراٹ چودھری نے ہفتہ کو جموئی ضلع کے چکائی بلاک میں زیر تعمیر انکور بایوکیم پرائیویٹ لمیٹڈ ایتھنول پلانٹ کا معائنہ کیا۔ افسران نے بتایا کہ پلانٹ میں مارچ 2027 تک پیداوار شروع ہوجائے گی۔جائزہ میٹنگ میں بتایا گیا کہ 105 ایکڑ میں قائم ہونے والا یہ پلانٹ روزانہ 10 لاکھ لیٹر ایتھنول تیار کرے گا۔ اس کی یومیہ پیداواری صلاحیت 1000 کلو لیٹر ہوگی۔ پلانٹ میں 20 میگاواٹ بجلی پیدا کرنے کی خود کفیل سہولت بھی قائم کی جائے گی، جبکہ زیرو لیکویڈ ڈسچارج (ZLD) نظام کے ذریعے پانی اور ماحول کے تحفظ پر توجہ دی جائے گی۔پلانٹ کو روزانہ تقریباً 30 ہزار کوئنٹل اناج درکار ہوگا، جس سے مقامی کسانوں کو اپنی پیداوار فروخت کرنے کے لیے مستقل منڈی ملنے کی امید ہے۔ بتایا گیا کہ جموئی میں انکور اسٹیل، انکور بایوکیم، سی ایل ایم ڈیولپرس اور انکور ٹریڈوسٹا سمیت مختلف صنعتی منصوبوں میں تقریباً 3400 کروڑ روپے کی سرمایہ کاری ہوگی اور 10 ہزار سے زائد براہِ راست و بالواسطہ روزگار کے مواقع پیدا ہوں گے۔
وزیر اعلیٰ کو چکائی میں مجوزہ صنعتی علاقے کے لیے نشان زد تقریباً 9 ہزار ایکڑ زمین کے بارے میں بھی تفصیلی معلومات دی گئیں۔ حکام کے مطابق تقریباً 5 ہزار ایکڑ زمین محکمہ جنگلات اور 4 ہزار ایکڑ رعیتی و دیگر زمروں میں ہے۔سمراٹ چودھری نے افسران کو 10 سے 12 دن میں زمین کی نقشہ سازی مکمل کرنے کی ہدایت دی، تاکہ جنگلاتی زمین، موجودہ جنگلات اور دیگر اراضی کی حقیقی صورت حال واضح ہوسکے۔ انہوں نے 4 ہزار ایکڑ رعیتی و دیگر زمین کا بھی تفصیلی جائزہ لینے اور 30 اکتوبر تک تمام تفصیلات جمع کرکے آئندہ کا لائحہ عمل تیار کرنے کی ہدایت دی۔
وزیر اعلیٰ نے لچھوار مندر اور گڑھی ڈیم کو سیاحتی مراکز کے طور پر ترقی دینے، لچھوار مندر میں بنیادی سہولیات اور عقیدت مندوں کے قیام کے انتظامات بہتر بنانے کی ہدایت دی۔ انہوں نے ضلع میں پولیس گشت مضبوط کرنے، تھانوں کے کام کاج کا جائزہ لینے اور امن و قانون برقرار رکھنے پر بھی زور دیا۔منشیات سے پاک سماج کے لیے عوامی بیداری مہم کے ساتھ پولیس و انتظامیہ کی کارروائی جاری رکھنے کی ہدایت بھی دی گئی۔
بھیم باندھ-لکشمی پور اور مونگیر-گنگٹا سڑکوں کی مسلسل نگرانی، روپ وے کی ضرورت کا جائزہ اور جنگلاتی علاقوں میں بجلی کی فراہمی کے لیے ضروری اقدامات کرنے کو کہا گیا۔وزیر اعلیٰ نے کہا کہ بہار کو صنعتی اور ہنرمندی کا مرکز بنانا حکومت کی ترجیح ہے۔
جموئی میں صنعتی علاقے کے قیام اور بڑے ایتھنول پلانٹ سے ضلع کی معاشی سرگرمیوں کو فروغ دینے کی سمت میں کام کیا جا رہا ہے۔ انہوں نے چکائی کے لیے نشان زد صنعتی اراضی کا فضائی معائنہ بھی کیا۔