ہندوستانی مردوں کی ٹیم کی سلیکشن کمیٹی میں سابق ہندوستانی آف اسپنر رمیش پوار کو نیا رکن مقرر کیا گیا ہے۔ کرکٹ مشاورتی کمیٹی (سی اے سی) کی سفارش کے بعد بی سی سی آئی نے ان کے نام کا باضابطہ اعلان کردیا ہے۔ اس فیصلے کے بعد ٹیسٹ میچوں میں تجربے کی بنیاد پر سابق بائیں ہاتھ کے اسپنر پرگیان اوجھا (24 ٹیسٹ میچ) اب سلیکشن کمیٹی کے نئے صدر (چیف سلیکٹر) ہوں گے۔
اشوک ملہوترا اور جتن پرانجپے پر مشتمل سی اے سی نے ممبئی میں واقع بی سی سی آئی کے صدر دفتر میں امیدواروں کے انٹرویو لیے، جس کے بعد پوار کے نام کی متفقہ طور پر سفارش کی گئی۔ پوار نے ویسٹ زون سے سابق چیف سلیکٹر اجیت اگرکر کی جگہ کمیٹی میں شمولیت اختیار کی ہے۔
پوار نے ہندوستان کی جانب سے 2 ٹیسٹ اور 31 ون ڈے میچ کھیلے ہیں۔ کرکٹ سے ریٹائرمنٹ کے بعد وہ مسلسل کوچنگ سے وابستہ رہے۔ ہندوستانی خاتون کرکٹ ٹیم کے ہیڈ کوچ رہنے کے علاوہ وہ ممبئی اور گجرات کی گھریلو ٹیموں کے بھی ہیڈ کوچ رہے۔ اس کے علاوہ وہ بنگلورو میں واقع بی سی سی آئی کے سینٹر آف ایکسی لینس (سی او ای) میں اسپن بالنگ کوچ کی ذمہ داری بھی نبھا چکے ہیں۔ ان کے دور میں ہندوستانی خواتین کی ٹیم نے ایشیا کپ کا خطاب جیتا تھا اور دولت مشترکہ کھیلوں (2022) میں چاندی کا تمغہ اپنے نام کیا تھا۔
بی سی سی آئی نے سابق چیف سلیکٹر اگرکر کی خدمات کی بھی ستائش کی۔ اگرکر کو جولائی 2023 میں سلیکشن کمیٹی کا صدر مقرر کیا گیا تھا۔ ان کے دور میں ہندوستانی ٹیم نے 3 آئی سی سی ٹرافیاں، 2 ایشیا کپ اور ایشیائی کھیلوں میں سونے کا تمغہ جیتا۔ بی سی سی آئی کے ضابطے کے مطابق، سلیکشن کمیٹی میں سب سے زیادہ ٹیسٹ میچ کھیلنے والے رکن کو صدر مقرر کیا جاتا ہے۔ اسی ہفتے کے آغاز میں ہندوستان کے سابق سلامی بلے باز وسیم جعفر نے تصدیق کی تھی کہ انہوں نے سلیکٹر کے عہدے کے لیے درخواست دی ہے۔ اگر ان کی تقرری ہوتی تو 31 ٹیسٹ میچ کھیلنے والے جعفر سلیکشن کمیٹی کے صدر بن جاتے۔
اوجھا (صدر) کے علاوہ اس کمیٹی میں شیو سندر داس، آر پی سنگھ، اجے راترا اور پوار شامل ہیں۔