پٹنہ، 7 دسمبر ۔ بہار میں عدالتی نظام کو تیز کرنے کے لیے 100 فاسٹ ٹریک عدالتیں قائم کی جائیں گی۔ ریاست کے نائب وزیر اعلیٰ اور وزیر داخلہ سمراٹ چودھری نے اتوار کے روز اس کا اعلان کیا۔ نائب وزیر اعلیٰ نے کہا کہ ان عدالتوں کے قیام کا بنیادی مقصد زیر التوا مقدمات کو تیزی سے نمٹانا، عدالتوں پر بوجھ کم کرنا اور حساس معاملات کی جلد سماعت کو یقینی بنانا ہے۔ فی الحال ریاست میں 18لاکھ سے زیادہ زیر التوا مقدمات ہیں، جس سے یہ قدم انتہائی ضروری ہے۔ نائب وزیر اعلیٰ نے کہا کہ پٹنہ میں آٹھ فاسٹ ٹریک عدالتیں تجویز کی گئی ہیں، جب کہ گیا، مظفر پور، دربھنگہ اور بھاگلپور میں چار چار عدالتیں قائم کی جائیں گی۔ نالندہ (بہار شریف)، روہتاس (سہسرام)، سارن (چھپرہ)، بیگوسرائے، ویشالی (حاجی پور)، مشرقی چمپارن (موتیہاری)، سمستی پور اور مدھوبنی میں تین فاسٹ ٹریک عدالتیں قائم کی جائیں گی۔ اسی طرح دو فاسٹ ٹریک عدالتیں مغربی چمپارن (بیتیا)، سہرسہ، پورنیہ، مونگیر، نوادہ، جہان آباد، ارول، اورنگ آباد، کیمور (بھبھوا)، بکسر، بھوجپور (آرا)، سیتامڑھی، شیوہر، سیوان، گوپال گنج، سپول، مدھے پورہ،ارریہ، کشن گنج ، کٹیہار، بانکا، جموئی، شیخ پورہ ، لکھی سرائے اور کھگڑیا میں 2-2فاسٹ ٹریک عدالتیں قائم کی جائیں گی۔اس کے علاوہ بگھا سب ڈویزنل عدالتوں میں ایک ایک فاسٹ ٹریک کورٹ قائم کرنے کی تجویز ہے۔ سمراٹ چودھری نے کہا کہ ضلع مجسٹریٹ، سینئرسپرنٹنڈنٹ آف پولیس، اور سپرنٹنڈنٹ آف پولیس کی طرف سے مشترکہ طور پر شناخت کیے گئے مقدمات کی ترجیحی بنیادوں پر کارروائی کی جائے گی۔ ریاست کے 38 اضلاع اور سب ڈویژنوں میں کل 100 فاسٹ ٹریک عدالتیں قائم کرنے کے لیے بڑے پیمانے پر اہلکاروں کی بھرتی بھی کی جائے گی۔ ہر عدالت کے لیے کل 900 آسامیاں تجویز کی گئی ہیں۔ نائب وزیر اعلیٰ سمراٹ چودھری نے کہا کہ 79 عدالتوں کو ایکٹ کورٹ کے طور پر نامزد کیا جائے گا تاکہ آرمس ایکٹ سے متعلق زیر التوا مقدمات کو تیزی سے نمٹا جا سکے۔ انہوں نے کہا کہ حکومت اس بات پر یقین رکھتی ہے کہ آرمس ایکٹ کے تحت سنگین مقدمات کے جلد حل سے امن و امان کو تقویت ملے گی۔ انہوں نے کہا کہ ریاستی حکومت عدالتی عمل کو تیز کرنے کے لیے پرعزم ہے، اسی لیے 100 فاسٹ ٹریک عدالتیں قائم کی جائیں گی۔