دربھنگہ، 15 اگست :بہار کی ممتاز للت نارائن متھلا یونیورسٹی (ایل این ایم یو)، دربھنگہ میں ہفتے کے روز 80ویں یومِ آزادی کے موقع پر مختلف مقامات پر پرچم کشائی کی گئی۔ مرکزی تقریب یونیورسٹی ہیڈ کوارٹر میں منعقد ہوئی، جہاں وائس چانسلر پروفیسر سنجے کمار چودھری نے پرچم کشائی کی۔
اس موقع پر مسٹر چودھری نے مجاہدینِ آزادی اور شہداء کو سلام پیش کرتے ہوئے کہا کہ ان کی قربانی، جدوجہد اور بے مثال شجاعت کی بدولت ہم وطن آج آزاد ہندستان میں سانس لے رہے ہیں۔ انہوں نے کہا کہ آزادی کے وقت ہندستان کی معاشی اور سماجی صورتحال کافی پسماندہ تھی، لیکن پانچ سالہ منصوبوں سمیت مختلف ترقیاتی پروگراموں کے ذریعے ملک نے مسلسل پیش رفت کی ہے۔
وائس چانسلر نے کہا کہ ہندستان نوجوانوں کا ملک ہے اور سال 2047 تک ترقی یافتہ ہندستان کے ہدف کی سمت ملک تیزی سے آگے بڑھ رہا ہے۔ انہوں نے یونیورسٹی کی ترقی کا ذکر کرتے ہوئے کہا کہ گزشتہ ڈھائی سال سے یونیورسٹی میں مکمل شفافیت کے ساتھ کام کیا جا رہا ہے۔ طلبہ کو روایتی تعلیم کے ساتھ روزگار پر مبنی مہارتیں فراہم کرنے کے مقصد سے مختلف شعبوں میں نئے ہنر مندی کے کورسز شروع کیے گئے ہیں۔
انہوں نے کہا کہ قومی تعلیمی پالیسی 2020 کے مطابق یونیورسٹی کا مقصد صرف طلبہ کو ڈگری فراہم کرنا نہیں، بلکہ انہیں مہارت، جدت طرازی، تحقیق اور اخلاقی قدروں سے آراستہ کرنا ہے۔ انہوں نے کہا، "ابھی ہماری یونیورسٹی ریاست میں اول ہے اور امید ہے کہ اگلے 10 سال میں یہ ملک کی بہترین 10 یونیورسٹیوں میں شامل ہوگی۔"