پٹنہ، 22 ستمبر: وزیر اعلیٰ سمراٹ چودھری نے شمسی توانائی کے فروغ کے لیے ریاستی حکومت کی جانب سے نئی مالی ترغیبی اسکیم کا آغاز کرتے ہوئے کہا ہے کہ وزیر اعظم سوریہ گھر مفت بجلی اسکیم کے مستفیدین کو مرکزی امداد کے علاوہ بہار حکومت بھی اضافی مالی مدد دے گی۔ ایک کلو واٹ کے سولر پلانٹ پر 10 ہزار، دو کلو واٹ پر 20 ہزار اور تین کلو واٹ پر بھی 20 ہزار روپے کی ریاستی امداد دی جائے گی۔وزیر اعلیٰ نے منگل کو انرجی آڈیٹوریم، پٹنہ میں مختلف توانائی اسکیموں کا افتتاح کیا۔ اس موقع پر انہوں نے ’وزیر اعلیٰ سولر ترغیبی اسکیم‘ کی نقاب کشائی کی اور پی ایم سوریہ گھر مفت بجلی اسکیم کے تحت عوامی بیداری کے لیے 9 سولر رتھوں کو ہری جھنڈی دکھا کر روانہ کیا۔ ریاستی حکومت کی جانب سے 25 ہزار مستفیدین کو اضافی مالی امداد بھی منتقل کی گئی۔
وزیر اعلیٰ نے کہا کہ شمسی توانائی کے استعمال سے گھریلو صارفین کے بجلی اخراجات کم ہوں گے اور حکومت پر سبسڈی کا بوجھ بھی کم ہوگا۔ انہوں نے بتایا کہ ریاست میں تقریباً 2.22 کروڑ بجلی کنکشن ہیں، جن میں 1.94 کروڑ گھریلو کنکشن ہیں۔ تقریباً 1.60 کروڑ خاندانوں کا گزشتہ ایک سال سے بجلی بل صفر آ رہا ہے۔سمراٹ چودھری نے کہا کہ بہار حکومت بجلی سبسڈی پر تقریباً 23 ہزار کروڑ روپے خرچ کر رہی ہے، جس میں تقریباً 5 ہزار کروڑ روپے زرعی شعبے کی سبسڈی پر خرچ ہوتے ہیں۔ آئندہ دو برسوں میں زرعی فیڈرز کو 100 فیصد شمسی توانائی سے جوڑنے کی سمت میں کام کیا جائے گا، تاکہ کسانوں کو صبح 6 بجے سے شام 6 بجے تک شمسی توانائی سے بجلی فراہم کی جاسکے۔ ان کے مطابق اس سے حکومت کو زرعی بجلی سبسڈی میں تقریباً 5 ہزار کروڑ روپے تک کی بچت ہوسکتی ہے۔
وزیر اعلیٰ نے کہا کہ بہار میں بجلی کی کھپت تقریباً 350 میگاواٹ سے بڑھ کر اب 10 ہزار میگاواٹ تک پہنچ چکی ہے۔ اگلے پانچ برسوں میں صنعتوں اور دیگر شعبوں کی بڑھتی ہوئی ضروریات کو مدنظر رکھتے ہوئے 20 ہزار میگاواٹ بجلی کا بنیادی ڈھانچہ تیار کرنے کا ہدف مقرر کیا گیا ہے۔انہوں نے کہا کہ صرف بجلی کی پیداوار بڑھانا کافی نہیں، بلکہ ٹرانسمیشن، تقسیم، گرڈ اور دیگر بنیادی ڈھانچے کو بھی اسی رفتار سے مضبوط کرنا ہوگا۔وزیر اعلیٰ نے کہا کہ دن کے مقابلے شام 6 بجے سے رات 10-11 بجے تک بجلی کی قیمت کہیں زیادہ ہوجاتی ہے۔ اس لیے شمسی توانائی کے ساتھ پاور اسٹوریج اور بیٹری اسٹوریج کو فروغ دینا ضروری ہے۔ حکومت سولر، بیٹری اسٹوریج، پمپ اسٹوریج اور دیگر گرین انرجی شعبوں میں سرمایہ کاری کو فروغ دے گی۔انہوں نے بتایا کہ گرین ہائیڈروجن کے لیے بھی پالیسی لانے کی سمت میں کام جاری ہے، جس سے بہار میں تقریباً 16 ہزار کروڑ روپے کی سرمایہ کاری کے امکانات ہیں۔وزیر اعلیٰ نے شمسی توانائی کے فروغ میں بہتر کارکردگی کا مظاہرہ کرنے والے مقامی اداروں کے لیے ترغیبی رقم کا بھی اعلان کیا۔ ضلع کی بہتر کارکردگی والی پنچایت کو ایک لاکھ روپے، میونسپل کارپوریشن کو ایک لاکھ، میونسپل کونسل کو 75 ہزار اور نگر پنچایت کو 50 ہزار روپے دیے جائیں گے۔انہوں نے محکمہ توانائی کے افسران اور ملازمین سے کہا کہ وہ گاؤں گاؤں جاکر لوگوں کو شمسی توانائی کے فوائد اور حکومت کی مالی امداد سے آگاہ کریں۔
پروگرام میں بجلی تقسیم کار کمپنیوں اور جیویِکا کے درمیان شمسی توانائی کے استعمال کو فروغ دینے کے لیے مفاہمت نامے پر دستخط بھی ہوئے۔ وزیر اعلیٰ نے ویڈیو کانفرنسنگ کے ذریعے سپول، نالندہ اور مونگیر کے مستفیدین سے بات کی۔ پروگرام میں نائب وزیر اعلیٰ وجے کمار چودھری، نائب وزیر اعلیٰ بیجندر پرساد یادو، توانائی کے وزیر شلیش کمار عرف بولو منڈل، چیف سکریٹری پرتیے امرت، وزیر اعلیٰ کے پرنسپل سکریٹری دیپک کمار اور دیگر اعلیٰ افسران موجود تھے۔