پٹنہ (اے بی این) بہار کی سیاست میں بڑی ہلچل کے درمیان سمراٹ چودھری کابینہ کی توسیع کی تیاریاں آخری مراحل میں داخل ہو گئی ہیں۔ اس پروقار تقریب کے لیے دارالحکومت پٹنہ کا تاریخی گاندھی میدان کسی دلہن کی طرح سجایا جا رہا ہے ، جہاں بی جے پی اور جے ڈی یو کے اعلیٰ قائدین کی آمد متوقع ہے ۔
ذرائع کے مطابق، اس تقریب میں وزیر اعظم نریندر مودی سمیت ملک کی کئی اہم شخصیات شرکت کریں گی۔ اعلیٰ حکام کی بڑی تعداد گاندھی میدان میں ڈیرہ ڈالے ہوئے ہے تاکہ سیکیورٹی اور دیگر انتظامات کا باریک بینی سے جائزہ لیا جا سکے ۔میدان کے مغربی حصے میں ایک عالیشان اسٹیج تیار کیا گیا ہے ، جس کے سامنے تین بڑے واٹر پروف پنڈال بنائے گئے ہیں۔ سب سے سامنے اراکین اسمبلی اور سینئر لیڈروں کے لیے نشستیں مختص کی گئی ہیں۔ معزز مہمانوں اور صحافیوں کے لیے الگ گیلریوں کی تعمیر مکمل ہو چکی ہے ۔عام شہریوں کی بڑی تعداد کے پیشِ نظر ایک وسیع رقبے کو بانسوں اور لکڑیوں سے گھیر کر محفوظ بنایا گیا ہے ، جہاں مزدور رنگ و روغن کے کام میں مصروف ہیں۔گرد و غبار سے بچنے کے لیے واٹر ٹینکرز کے ذریعے پورے میدان میں پانی کا چھڑکاؤ کیا جا رہا ہے اور صفائی عملہ دن رات کچرا ہٹانے میں مصروف ہے ۔ وہاں موجود ایک ملازم نے میڈیا سے گفتگو کرتے ہوئے کہا، "ایسا لگ رہا ہے جیسے گاندھی میدان کے دن پھر گئے ہیں۔گاندھی میدان کی طرف آنے والی تمام شاہراہیں سیاسی رنگ میں رنگ چکی ہیں۔ ہر طرف بڑے بڑے ہورڈنگز اور بینرز آویزاں ہیں جن پر وزیر اعظم نریندر مودی، وزیر داخلہ امت شاہ، بی جے پی کے قومی صدر نتن نبین، وزیر دفاع راج ناتھ سنگھ اورسابق وزیر اعلیٰ نتیش کمار کی تصاویر نمایاں ہیں۔قابل ذکر ہے کہ سمراٹ کابینہ میں نئے چہرے کے طور پر نتیش کمار کے صاحبزادے نشانت کمار کی شمولیت طے مانی جارہی ہے۔ حلف برداری تقریب میں شرکت کےلئے مرکزی وزیر داخلہ امت شاہ بدھ کی شام پٹنہ پہنچے، جہاں ان کا والہانہ استقبال کیاگیا۔
دوسری جانب سے ریاست میں لگاتار دو دنوں سے بارش کی وجہ سے گاندھی میدان میں پانی جمع ہوگیا ہے انتظامیہ اسے نکالنے کیلئے کافی کوشش کررہی ہے ۔ ٹھہر ٹھہر کر بارش ہونے کی وجہ سے مزید مشکلات کا سامنا کرنا پڑ رہا ہے ۔ ایک طرف انتظامیہ پانی ختم کرنے کیلئے انتھک کوشش کررہا ہے وہیں دوسری جانب بارش نے بھی انتظامیہ کے چہرے پر شکن لادیا ہے دیکھنا ہے کہ صبح موسم کا حال کیسا رہتا ہے ۔