پٹنہ، 15 اگست (اے بی این) وزیراعلیٰ سمراٹ چودھری نے ہفتہ کے روز 80ویں یومِ آزادی کے موقع پر بہار کے عوام کی خوشی اور خوشحالی کی تمنا کے ساتھ پٹنہ کے گاندھی میدان میں پہلی بار قومی پرچم لہرایا اور پریڈ کی سلامی لی۔مسٹر چودھری نے اس موقع پر کہا کہ یہ دن ان عظیم مجاہدینِ آزادی اور شہداء کے ایثار، ریاضت اور قربانیوں کی علامت ہے، جنہوں نے اپنی جانیں نچھاور کر کے ہمیں آزادی دلائی۔ انہوں نے کہا کہ آزادی صرف ہمارا حق نہیں بلکہ ایک ذمہ داری بھی ہے۔ انہوں نے مزید کہا کہ آج کا بہار "سیوا، سنکلپ، سمیرپن" کے جذبے کے ساتھ آگے بڑھ رہا ہے۔وزیراعلیٰ نے کہا کہ ان کی حکومت کا مقصد ریاست کے ہر شہری کو مساوی مواقع فراہم کرنا ہے۔ انتظامیہ شفاف ہو اور ہر فرد کو عزت و وقار کے ساتھ جینے کا موقع ملے۔ اسی سوچ کے ساتھ ریاست میں 'سہیگو شیوِر' کا آغاز کیا گیا ہے۔ یہ انتظامیہ کو عوام کی دہلیز تک پہنچانے کی ایک اہم پہل ہے۔ انہوں نے کہا کہ ہر ماہ کے پہلے اور تیسرے منگل کو منعقد ہونے والے ان سہیگو شیوِر کے ذریعے عام شہری اپنی شکایات اور مسائل براہِ راست انتظامیہ کے سامنے رکھ سکتے ہیں۔ عوامی شکایات کے تدارک کے لیے 30 دنوں کی سخت ٹائم لائن مقرر کی گئی ہے۔
مسٹر چودھری نے کہا کہ ان کی حکومت نے جرائم کے خلاف زیرو ٹالرنس کی پالیسی اپنائی ہے۔ پولیس کی جدید کاری کے سلسلے میں متعدد اہم اقدامات کیے گئے ہیں۔ انہوں نے کہا کہ ریاست میں 'ایمرجنسی رسپانس سپورٹ سسٹم' کے تحت 1,833 ہنگامی گاڑیوں کے ذریعے اوسطاً 10 منٹ کے اندر ایمبولینس، پولیس، فائر برگیڈ، ہائی وے پیٹرولنگ، ڈیزاسٹر رسپانس اور وومن و چائلڈ ہیلپ لائن جیسی سہولیات فراہم کی جا رہی ہیں۔ انہوں نے کہا کہ خواتین کی تحفظ کو اولین ترجیح دیتے ہوئے ریاست کے تمام تھانہ علاقوں میں "ابھیا برگیڈ" کی تشکیل کی گئی ہے اور 'پولیس دیدیوں' کو 5,000 اسکوٹی دینے کا فیصلہ کیا گیا ہے تاکہ انہیں اسکولوں، کالجوں کے باہر اور عوامی مقامات پر تعینات کیا جا سکے۔
وزیراعلیٰ نے کہا کہ 27 سال پہلے ہماری ریاست کا بجٹ بہت کم ہوا کرتا تھا اور اس وقت کل بجٹ کا 87 فیصد حصہ جھارکھنڈ سے آتا تھا۔ انہوں نے کہا کہ 2026-27 کے لیے بہار حکومت نے 3 لاکھ 47 ہزار 590 کروڑ روپے کا بجٹ پیش کیا ہے۔ یہ بجٹ ریاست کی ترقی کے روڈ میپ کی نشاندہی کرتا ہے۔ اس بجٹ میں بنیادی ڈھانچے، تعلیم، صحت، زراعت، روزگار، ٹیکنالوجی اور سماجی تحفظ کو ترجیح دی گئی ہے۔ انہوں نے کہا کہ گڈز اینڈ سروسز ٹیکس (جی ایس ٹی) کے نفاذ سے بہار کا مالیاتی نظام مضبوط ہوا ہے اور مالی سال 2026-27 کے ماہِ جون تک کے کل ریونیو کی وصولی میں بہار نے 16.75 فیصد کا اضافہ درج کیا ہے۔
مسٹر چودھری نے کہا کہ 'بہار انڈسٹریل انویسٹمنٹ پروموشن پیکیج 2025' میں ترمیم اور توسیع کی گئی ہے۔ اس کے ساتھ ہی 'بہار سیمی کنڈکٹر پالیسی 2026' کا آغاز کیا گیا ہے جس کا ہدف ہے کہ سال 2030 تک بہار سیمی کنڈکٹر مینوفیکچرنگ سے جڑی صنعتوں کا ایک بڑا مرکز بن جائے۔ انہوں نے کہا کہ اس وقت بہار میں 100 سے زائد صنعتی علاقے، تقریباً 10,000 ایکڑ صنعتی زمین، پلگ اینڈ پلے شیڈز، ڈرائی پورٹ، ملٹی ماڈل لاجسٹکس سہولیات اور ایسٹرن ڈیڈیکیٹڈ فریٹ کوریڈور سے کنیکٹیویٹی دستیاب ہے۔ ہر ضلع میں صنعتی زون تیار کرنے کے مقصد سے 14,600 ایکڑ نئی صنعتی زمین کے حصول کی منظوری دی گئی ہے۔ انہوں نے کہا کہ حکومت کا ہدف بہار کی زمین پر 5 لاکھ کروڑ روپے کی سرمایہ کاری لانا ہے۔ انہوں نے ریاست سے باہر مقیم تمام بہاریوں سے اپیل کرتے ہوئے کہا کہ بہار آپ کی جنم بھومی ہے، آپ کی کرم بھومی جہاں بھی ہو، آپ اپنی کرم بھومی سے جنم بھومی کی طرف لوٹیں اور بہار کی خوشحالی میں اپنا تعاون دیں۔