مونگیر، 28 دسمبر (اے بی این) نائب وزیر اعلیٰ سمراٹ چودھری نے اتوار کو کہا کہ کھڑگپور جھیل کی ترقی سے جہاں مونگیر ضلع کو بین الاقوامی سیاحتی نقشے پر نئی شناخت حاصل ہوگی، وہیں بڑے پیمانے پر روزگار کے مواقع پیدا ہوں گے اور اقتصادی ترقی کو بھی تقویت ملے گی۔
مسٹر چودھری نے آج مونگیر ضلع میں واقع کھڑگپور جھیل میں کشتی رانی کا باقاعدہ افتتاح کیا۔ انہوں نے کہا کہ کھڑگپور جھیل کی ترقی نہ صرف ضلع کو عالمی سیاحتی نقشے پر نمایاں کرے گی بلکہ روزگار کے وسیع مواقع اور معاشی خوشحالی کا سبب بھی بنے گی۔
انہوں نے کہا کہ بہار میں وزیر اعلیٰ نتیش کمار کی قیادت میں قائم قومی جمہوری اتحاد (این ڈی اے) حکومت اس سمت میں مسلسل اور منصوبہ بند طریقے سے کام کر رہی ہے۔
مسٹر چودھری مونگیر ضلع کے حویلی کھڑگپور پہنچے، جہاں انہوں نے سب ڈویژنل اسپتال حویلی کھڑگپور میں مختلف طبی خدمات کا افتتاح کیا اور کھڑگپور جھیل کے ترقیاتی کاموں کے لیے مقام کا معائنہ کیا۔ اس موقع پر انہوں نے 100 بستروں والے سب ڈویژنل اسپتال میں طبی خدمات کے آغاز کو علاقے کے لیے ایک بڑی کامیابی قرار دیا۔ انہوں نے کہا کہ اسپتال میں جدید طبی آلات کے ساتھ ڈاکٹروں اور طبی عملے کی مناسب تعداد تعینات کی گئی ہے، جس سے مقامی لوگوں کو بہتر صحت سہولیات میسر آئیں گی۔
مسٹر چودھری نے حویلی کھڑگپور جھیل کے قریب کیے گئے تزئین و آرائش کے کاموں کا بھی افتتاح کیا۔ انہوں نے جھیل کی مجموعی ترقی کے سلسلے میں محکمہ جنگلات و ماحولیات و موسمیاتی تبدیلی، محکمہ آبی وسائل، پبلک ہیلتھ انجینئرنگ محکمہ، محکمہ تعمیرات سڑک، محکمہ سیاحت و دیہی ترقی، محکمہ صحت، محکمہ چھوٹی آبپاشی اور محکمہ تعاون کے افسران کے ساتھ تفصیلی میٹنگ کی اور ضروری ہدایات جاری کیں۔
اس کے علاوہ نائب وزیر اعلیٰ نے بہار اسٹیٹ سبزی پروسیسنگ و مارکیٹنگ کوآپریٹو اسکیم کے تحت مونگیر ضلع کی پانچ پرائمری سبزی پیدا کرنے والی کوآپریٹو سوسائٹیوں۔تاراپور، اثرگنج، سنگرام پور، ٹیٹیا بمبر اور حویلی کھڑگپورمیں بنیادی ڈھانچے کی تعمیر کا سنگ بنیاد بھی رکھا۔ انہوں نے کہا کہ اس اقدام سے کسانوں کو بہتر مارکیٹنگ سہولیات حاصل ہوں گی اور ان کی آمدنی میں اضافہ ہوگا۔ نائب وزیر اعلیٰ نے امید ظاہر کی کہ صحت، سیاحت اور زراعت سے متعلق یہ ترقیاتی منصوبے مونگیر ضلع کو نئی رفتار دیں گے اور مقامی عوام کے معیارزندگی میں مثبت تبدیلی آئے گی۔