پٹنہ۔ بہار میں سیلاب کی صورتحال کو دیکھتے ہوئے ریاستی حکومت نے انتظامی نگرانی مزید سخت کر دی ہے۔ وزیر اعلیٰ سمراٹ چودھری نے سیلاب سے متاثرہ 13 اضلاع میں وزرا اور سکریٹریوں کو خصوصی نگرانی کی ذمہ داری سونپی ہے۔ انہیں متاثرہ علاقوں میں موجود رہ کر صورتحال کا جائزہ لینے، ضلعی انتظامیہ کے ساتھ تال میل قائم رکھنے اور راحت و بچاؤ کے کاموں کو تیز کرنے کی ہدایت دی گئی ہے۔وزیر اعلیٰ نے جمعرات کو سیلاب سے متاثرہ علاقوں کا فضائی سروے کیا۔ فضائی جائزے کے دوران انہوں نے مختلف علاقوں میں سیلاب کی صورتحال اور پانی کے پھیلاؤ کا مشاہدہ کیا۔ اس کے بعد بھاگلپور پہنچ کر انہوں نے زمینی سطح پر جاری راحت اور بچاؤ کے کاموں کا جائزہ لیا۔ افسران سے متاثرہ علاقوں، راحتی سرگرمیوں اور بچاؤ کی تیاریوں کے بارے میں معلومات لی گئی۔
ادھر پٹنہ میں گنگا ندی کے پانی کی سطح خطرے کے نشان سے اوپر پہنچنے کے بعد ہائی الرٹ جاری ہے۔ پانی کی سطح میں مسلسل اضافہ ہونے سے انتظامیہ کی تشویش بڑھ گئی ہے۔ گاندھی گھاٹ پر گنگا کے پانی کی سطح میں محض چار گھنٹے کے دوران 10 سینٹی میٹر کا اضافہ بھی درج کیا گیا ہے۔پانی کی سطح میں تیزی سے اضافے کو دیکھتے ہوئے ندی کے کنارے اور نشیبی علاقوں میں خصوصی نگرانی کی جا رہی ہے۔ انتظامیہ کو ممکنہ سیلابی صورتحال سے نمٹنے کے لیے راحت و بچاؤ کے وسائل تیار رکھنے اور ضرورت پڑنے پر فوری کارروائی کرنے کی ہدایت دی گئی ہے۔
سیلاب کی صورتحال کے پیش نظر تمام اضلاع کے ڈی ایم اور ایس پی کو بھی الرٹ کیا گیا ہے۔ ضلعی افسران کو اپنے علاقوں میں پانی کی سطح، حساس مقامات اور نشیبی علاقوں کی مسلسل نگرانی کرنے کو کہا گیا ہے۔ کسی بھی ہنگامی صورتحال میں فوری طور پر راحت و بچاؤ کا کام شروع کرنے اور اعلیٰ حکام کو صورتحال سے آگاہ کرنے کی ہدایت دی گئی ہے۔وزیر اعلیٰ نے متاثرہ اضلاع میں تعینات وزرا اور افسران کو ہدایت دی ہے کہ وہ زمینی سطح پر صورتحال کی نگرانی کریں اور متاثرہ لوگوں تک راحت پہنچانے میں کسی طرح کی تاخیر نہ ہو۔ حکومت کی ترجیح متاثرہ علاقوں میں فوری راحت، محفوظ مقامات پر منتقلی اور بچاؤ کے اقدامات کو مؤثر بنانا ہے۔