کھگڑیا :(اے بی این )ضلع میں ہوئے خوفناک سڑک حادثے میں 7 لوگوں کی موت ہو گئی ہے، جبکہ 4 افراد شدید طور پر زخمی ہو گئے ہیں۔ حادثے کے سبب علاقے میں کہرام مچ گیا ہے۔ آناً فاناً میں موقع پر پہنچی پولیس نے لاشوں کو پوسٹ مارٹم کے لیے مردہ گھر بھیج دیا ہے۔ دراصل کچھ لوگ آٹو میں سوار ہو کر کہیں جا رہے تھے، تبھی تیز رفتار ٹرک نے انہیں زوردار ٹکر مار دی۔موصولہ اطلاعات کے مطابق یہ حادثہ مانسی تھانہ علاقہ کے این ایچ 31 ٹھاٹھا گاؤں کے پاس پیش آیا۔ پیر کو دوپہر تقریباً 4 بجے مسافروں سے بھرا ایک آٹو کھگڑیا سے مہیش کھونٹ کی طرف جا رہا تھا۔ اس دوران غلط روٹ سے تیز رفتار میں آ رہے ٹرک نے آٹو میں زوردار ٹکر مار دی۔ حادثہ اتنا شدید تھا کہ آٹو کے پرخچے اڑ گئے۔ اس میں سوار مسافر دور جا گرے۔ اس دوران 7 لوگوں کی موت ہو گئی، جبکہ 4 لوگ شدید زخمی ہونے کے سبب تڑپنے لگے۔
زخمیوں کو علاج کے لیے کھگڑیا صدر اسپتال میں بھرتی کرایا گیا ہے۔ مرنے والوں میں 3 خواتین سمیت 7 لوگ شامل ہیں۔ حادثے کے وقت موقع پر افراتفری مچ گئی۔ مقامی لوگ زخمیوں کو بچانے کے لیے دوڑے تو ٹرک کے ڈرائیور نے بھاگنے کی کوشش کے دوران ایک پِک اپ اور ٹاٹا سفاری کار کو بھی روند دیا۔ اس دردناک واقعہ کو لے کر مقامی لوگوں میں کافی غصہ ہے۔ انہوں نے ٹرک ڈرائیور کے خلاف سخت کارروائی کرنے کا مطالبہ کیا ہے۔ ملزم ٹرک ڈرائیور اپنی گاڑی چھوڑ کر فرار ہو گیا ہے۔ پولیس اس کی تلاش میں مصروف ہے۔ لوگوں نے اسے پکڑنے کی کوشش کی لیکن وہ بچ کر بھاگ نکلا۔
وزیر اعلیٰ سمراٹ چودھری نے کھگڑیا ضلع کے مانسی تھانہ حلقہ کے ٹھاٹھا این ایچ 31 پر سڑک حادثہ میں 6افراد کی ہوئی موت پر گہرے رنج و غم کا اظہار کیا ہے ۔وزیر ا علیٰ نے اس واقعہ کو انتہائی افسوسناک بتا یا ہے ۔ وزیر اعلیٰ نے سوگوار کنبوں کو صدمہ اس کی گھڑی میں صبر کی قوت دینے کی دعا کی ہے ۔
وزیر اعلیٰ نے تمام مہلوکین کے پسماندگان کو آفات مینجمنٹ محکمہ سے 4-4 لاکھ روپے امداد کی رقم دینے کی ہدایت دی ہے ۔ وزیر اعلیٰ نے اس سڑک حادثہ میں زخمی لوگوں کا مکمل علاج کرانے کی ہدایت دی ہے اور ان کی جلد صحت یابی کی دعا کی ہے ۔