پٹنہ، 25 جولائی:(اے بی این ) وزیر اعلیٰ سمراٹ چودھری نے آج راجونشی نگر میں لوک نائک جے پرکاش نارائن(ایل این جے پی) ہسپتال کیمپس میں 400 بیڈ پر مشتمل آرتھوپیڈک سپر اسپیشلٹی ہسپتال کی نئی عمارت کا افتتاح کیا۔ افتتاح کے بعد وزیراعلیٰ نے اسپٍتال کے مختلف شعبوں، جدید طبی آلات اور دستیاب صحت کی سہولیات کا تفصیلی معائنہ کیا۔ انہوں نے داخل مریضوں سے بھی بات کی تاکہ وہ حاصل کی جانے والی طبی خدمات اور علاج کے بارے میں جان سکیں۔ اس سپر اسپیشلٹی اسپتال میں تمام جدید سہولیات موجود ہیں جن میں عالمی معیار کا ماڈیولر آپریٹنگ تھیٹر، جدید ترین آئی سی یو، اسپورٹس انجری سنٹر، جدید ریڈیولاجی ڈیپارٹمنٹ، جدید فزیو تھراپی یونٹ، ٹراما اور ایمرجنسی سروسز،او پی ڈی، پلاسٹر روم، مائنر او ٹی ، ایم آر آئی ، تھراپی یونٹ روم ،پیشہ وارانہ علاج یونٹ جیسی تمام جدیدسہولتیں مہیا کرائی گئی ہیں۔
وزیر اعلیٰ نے کہا کہ ریاستی حکومت کا مقصد بہار کے لوگوں کو ان کی اپنی ریاست میں عالمی معیار اور معیاری طبی خدمات فراہم کرنا ہے۔ اس جدید اسپتال کے شروع ہونے سے اب مریضوں کو سنگین آرتھوپیڈک بیماریوں کے علاج کے لیے دوسری ریاستوں پر انحصار نہیں کرنا پڑے گا۔ انہوں نے کہا کہ ایل این جے پی اسپتال میں اس سپر اسپیشلٹی ہسپتال کا افتتاح اس عزم کا ایک اہم کڑی ہے۔ جہاں علاج اور صحت یاب ہوجانے تک کی جامع خدمات ایک ہی چھت کے نیچے مہیا ہو نے سے مریضوں کو بہتر ، فوری اور جامع طبی سہولیات فراہم ہوں گی۔
پروگرام میںنائب وزیر اعلیٰ وجے کمار چودھری، وزیر صحت جناب نشانت، رکن پارلیمنٹ جناب روی شنکر پرساد،رکن اسمبلی جناب سنجیو چورسیا، رکن قانون ساز کونسل جناب نول کشور یادو، وزیراعلیٰ کے پرنسپل سکریٹری مسٹر دیپک کمار، چیف سکریٹری مسٹر پرتیئے امرت، ڈیولپمنٹ کمشنر مسٹر مہیر کمار سنگھ، وزیر اعلیٰ کے سکریٹری مسٹر لوکیش کمار سنگھ اور دیگر متعلقہ افسران سمیت محکمہ صحت کے سینئر افسران اور دیگر افسران بھی موجود تھے۔ پروگرام میں لوک نائک جئے پرکاش نارائن اسپتال سے منسلک ڈاکٹر موجود تھے۔