اسرائیل اور امریکہ کے ذریعہ ایران پر کیے گئے زور دار حملوں کے بعد اب ایران نے بھی جوابی کارروائی کے تحت درجنوں میزائلیں داغ دی ہیں۔ موصولہ اطلاع کے مطابق ایران نے اسرائیل کی طرف تقریباً 70 بیلسٹک میزائلیں داغی ہیں، جس کے بعد تل ابیب میں سائرن کی گونج سنائی دے رہی ہے۔ اسرائیل کی فوج ’آئی ڈی ایف‘ نے اس کی تصدیق بھی کی ہے۔ اسرائیلی فوج کا کہنا ہے کہ ایران سے اسرائیل کی طرف بیلسٹک میزائلیں لانچ کیے جانے کی شناخت ہوئی ہے، پورے ملک میں الرٹ ایکٹیویٹ کر دیا گیا ہے۔
اسرائیل کے جو شہر ایرانی میزائلوں کی زد میں آئے ہیں، ان میں یروشلم، حائفہ اور سیف اللہ شامل بتائے جا رہے ہیں۔ یروشلم میں اس وقت سائرن کی آواز تیزی کے ساتھ سنی جا رہی ہے۔ ایرانی حملہ کے بعد لوگوں کو بم شیلٹر میں جانے کی ہدایت بھی دی گئی ہے۔ میڈیا رپورٹس میں بتایا جا رہا ہے کہ ایران نے دوسری بار اسرائیل کی طرف میزائلوں کا ایک ذخیرہ بھیجا ہے اور اسرائیل اپنی پوری صلاحیت کے ساتھ ان ایرانی میزائلوں کو تباہ کرنے میں مصروف ہے۔
ایران کی آرمی آئی آر جی سی نے حملہ کے بارے میں جانکاری دیتے ہوئے بتایا ہے کہ اسرائیل پر ڈرون-میزائل حملوں کی پہلی لہر ابھی ابھی مکمل ہوئی ہے۔ حالانکہ آئی آر جی سی نے ابھی پہنچائے گئے نقصان کے بارے میں کوئی دعویٰ نہیں کیا ہے۔ کچھ میڈیا رپورٹس میں بتایا گیا ہے کہ شمالی اسرائیل میں کئی دھماکوں کی آوازیں سنی گئی ہیں۔ اسرائیل نے اپنے اینٹی میزائل ڈیفنس سسٹم کو پوری طرح فعال کر دیا ہے۔ اسرائیل نے پورے ملک میں ’نیشن وائیڈ ایمرجنسی‘ اور ’اسپیشل اسٹیٹ آف ایمرجنسی‘ کا اعلان بھی کر دیا ہے۔ کچھ میڈیا رپورٹس میں پورے اسرائیل میں سائرن بجنے کی اطلاع دی گئی ہے۔
اسرائیل کی میگن ڈیوڈ ایڈوم ایمبولنس سروس نے بھی ایرانی حملہ کی تصدیق کی ہے۔ اس کا کہنا ہے کہ شمالی اسرائیل پر ایران کے بیلسٹک میزائل حملوں میں کسی کے زخمی ہونے کی کوئی خبر نہیں ہے۔ کم از کم 2 میزائلیں داغی گئیں، جن میں سے ایک کے کھلی جگہ پر گرنے کی اطلاع ہے۔ اس درمیان آئی ڈی ایف نے اس بات کی بھی تصدیق کر دی ہے کہ اس نے ایران سے بیلسٹک میزائلوں کا مزید ایک لانچ ڈٹیکٹ کیا ہے۔ غور کرنے والی بات یہ ہے کہ اسرائیل پر ایرانی حملہ اس لیے بھی شدید معلوم پڑ رہا ہے، کیونکہ حوثی اور حزب اللہ نے بھی اپنا محاذ کھول دیا ہے۔ اس سے ایران-اسرائیل جنگ ایک نئے مرحلہ میں داخل ہوتی دکھائی دے رہی ہے۔
س سے قبل امریکہ اور اسرائیل نے ایک ساتھ تقریباً 30 میزائلوں سے ایران کے کئی شہروں پر حملہ کیا تھا۔ ان حملوں میں ایران کے نیوکلیئر سنٹرس کو تو نشانہ بنایا ہی گیا، ساتھ ہی ساتھ ایرانی صدر پزشکیان اور سپریم لیڈر خامنہ ای کو بھی ہدف بنایا گیا۔ حالانکہ پزشکیان اور خامنہ ای محفوظ بتائے جا رہے ہیں۔ اسرائیل نے اس آپریشن کو ’شیلڈ آف جوڈا‘ نام دیا ہے۔