بہار کے سابق وزیر اعلیٰ اور جنتا دل یونائیٹڈ (جے ڈی یو) کے قومی صدر نتیش کمار منگل کو پارٹی کے ریاستی ہیڈکوارٹر پہنچے اور وہاں موجود کارکنوں کو بانکی پور اسمبلی ضمنی انتخاب میں متحد ہو کر قومی جمہوری اتحاد (این ڈی اے ) کے امیدوار کو جیت دلانے کا پیغام دیا۔سابق وزیر اعلیٰ مسٹر کمار کی آمد پر ریاستی دفتر کے احاطے میں موجود لیڈران، عہدیداروں اور کارکنوں نے ان کا گرمجوشی سے خیرمقدم اور استقبال کیا۔ مسٹر نتیش کمار نے موجود لیڈران اور کارکنوں سے دلی ملاقات کی، ان کا سلام قبول کیا اور سب کی خیریت دریافت کی۔اس دوران مسٹر کمار نے ریاستی دفتر کے احاطے کا معائنہ کیا اور دفتر کے مختلف انتظامات اور تنظیمی سرگرمیوں کا تفصیلی جائزہ بھی لیا۔ انہوں نے پارٹی دفتر میں منعقدہ عوامی سماعت کے پروگرام (جن سنوائی) کا جائزہ لیتے ہوئے مناسب ہدایات دیں اور وہاں موجود رہنماؤں اور کارکنوں کی رہنمائی بھی کی۔مسٹر کمار نے موجودہ کارکنوں سے کہا کہ بانکی پور اسمبلی ضمنی انتخاب میں این ڈی اے امیدوار کو بھاری اکثریت سے کامیاب بنانے کے لیے منظم ہو کر کام کریں۔ انہوں نے کارکنوں کو بوتھ سطح تک تنظیم کو مضبوط کرنے ، ووٹرز سے مسلسل رابطہ برقرار رکھنے اور منظم و مثبت انداز میں انتخابی مہم چلانے کی ہدایت دی اور اعتماد ظاہر کیا کہ کارکنوں کی محنت اور عوام کے تعاون سے بانکی پور میں این ڈی اے کے امیدوار کی کارکردگی شاندار رہے گی۔اس موقع پر وزیر شراون کمار، قانون ساز کونسل میں حکمران جماعت کے نائب رہنما للن کمار صراف، چیف وہپ سنجے کمار سنگھ عرف گاندھی جی سمیت بڑی تعداد میں پارٹی کے سینئر رہنما، عہدیداران اور کارکنان موجود تھے ۔