مظفر پور، 22 اپریل (اے بی این) مظفر پور ضلع میں پولیس نے سائبر نیٹ ورک گینگ کا پردہ فاش کرتے ہوئے چار لوگوں کو گرفتار کیا ہے۔سینئر سپرنٹنڈنٹ آف پولیس کانتیش کمار مشرا نے بدھ کو بتایا کہ منگل کو اطلاع کی بنیاد پر آہیا پور تھانہ علاقہ کے گرہا او پی علاقہ میں چھاپہ مارا گیا۔ اطلاع یہ تھی کہ کفین چودھری گاؤں کا رہنے والا ریشم کمار غیر قانونی اے پی آئی بنا کر لوگوں کی ذاتی معلومات غیر ملکی سائبر گینگ کو فروخت کر رہا ہے۔ معاملے کی سنگینی کو دیکھتے ہوئے فوری طور پر ایک خصوصی ٹیم تشکیل دی گئی جس میں بہار اسپیشل ٹاسک فورس (ایس ٹی ایف)، ڈسٹرکٹ انٹیلی جنس یونٹ اور سائبر پولیس اسٹیشن کے افسران شامل تھے۔
مسٹر مشرا نے بتایا کہ پولیس نے تیزی سے کام کیا اور مرکزی ملزم ریشم کمار کو گرفتار کر لیا۔ اس کی نشاندہی پر تین دیگر ملزمین، دیپک چودھری عرف آشو کمار (غازی پور، یوپی)، سدھانشو کمار (دربھنگہ) اور ساحل کمار (مظفر پور) کو بھی گرفتار کیا گیا۔ ان تمام کے پاس سے موبائل فون برآمد ہوئے جس میں اہم ڈیجیٹل شواہد موجود تھے۔ تفتیش میں انکشاف ہوا کہ ملزمان ڈیٹا اکٹھا کرنے کے لیے جعلی سم کارڈز اور ٹیلی گرام آئی ڈی استعمال کرتے تھے۔ اس کے بعد یہ حساس معلومات ٹیلی گرام باٹ، اے پی آئی اور اوایس آئی این ٹی ٹولز کے ذریعے غیر ملکی مجرموں کو فروخت کی جاتی تھیں۔ ملزمین کے آلات سے متعدد مشکوک ٹیلی گرام گروپس اور چینلز کے آپریشن کے شواہد ملے ہیں۔
سینئر سپرنٹنڈنٹ آف پولیس نے بتایا کہ مرکزی ملزم سے چار موبائل فون اور ایک آئی پیڈ ضبط کیا گیا ہے۔ پولیس کو ان کے بینک کھاتوں میں تقریباً چار لاکھ روپے کی مشکوک لین دین کے شواہد بھی ملے، جنہیں فی الحال منجمد کر دیا گیا ہے۔ مزید برآں، غیر ملکی گروہوں کے ساتھ ڈیٹا کے لین دین سے متعلق بات چیت بھی سامنے آئی ہے۔ پولیس اب اس نیٹ ورک کے بین الاقوامی رابطوں کی چھان بین کر رہی ہے اور اس میں ملوث دیگر افراد کی شناخت کر رہی ہے۔