پٹنہ (اے بی این)چیف سکریٹری پرتیئے امرت نے راجگیر میں واقع عالمی شہرت یافتہ نالندہ یونیورسٹی کے شاندار کیمپس کا دورہ کیا۔ اس دورے کا بنیادی مقصد یونیورسٹی کی تعلیمی سرگرمیوں، انفراسٹرکچر اور اس کے منفرد 'نیٹ زیرو، ماحولیاتی ماڈل کے بارے میں جانکاری حاصل کرنا تھا۔اس موقع پر نالندہ کے ضلع مجسٹریٹ اور پولس سپرنٹنڈنٹ سمیت دیگر اعلیٰ سرکاری افسران موجود تھے۔یونیورسٹی پہنچنے پر چیف سیکرٹری کا سینئر فیکلٹی ممبران نے استقبال کیا۔یونیورسٹی کے فیکلٹی ممبران نے چیف سیکرٹری کو ادارے کے تاریخی ماضی اور موجودہ تعلیمی ڈھانچے کے بارے میں پرزنٹیشن کےذریعہ واقف کرایا۔ انہیں بتایا گیا کہ یونیورسٹی اس وقت مختلف بین الاقوامی سطح پر تسلیم شدہ اسکول چلا رہی ہے، جیسے کہ تاریخی مطالعات، ماحولیات اور ماحولیاتی علوم، اور بدھسٹ اسٹڈیز،امرت نے یونیورسٹی کی جدید ترین لائبریری، سشما سوراج آڈیٹوریم، یوگا کمپلیکس، اور اکیڈمک بلاکس کا معائنہ کیا۔ انہوں نے قدیم نالندہ کے فن تعمیر اور جدید ٹیکنالوجی کے شاندار امتزاج کی تعریف کی۔ چیف سکریٹری نے یونیورسٹی کے 6.5میگاواٹ کے سولر فارم، بائیو گیس پلانٹ اور واٹر ہارویسٹنگ سسٹم میں خصوصی دلچسپی لی۔ انہوں نے کہا کہ نالندہ یونیورسٹی کا 'نیٹ زیرو کاربن فوٹ پرنٹ ماڈل بہار کے دیگر اداروں کے لیے ایک تحریک کا کام کرے۔معائنہ کے بعد افسران اور فیکلٹی ممبران سے خطاب کرتے ہوئے چیف سکریٹریپرتیئے امرت نے کہاکہ نالندہ نہ صرف بہار کے لئے بلکہ پوری دنیا کے لئے علم کی علامت رہا ہے۔ اس نو تعمیر شدہ کیمپس کو دیکھ کر خوشی ہوئی، جو اس کے قدیم ورثے کو جدید اختراع کے ساتھ ملاتا ہے۔ ریاستی حکومت اس یونیورسٹی کے بین الاقوامی مرکز کے طور پر علم کی ترقی کے لئے ہر ممکن تعاون فراہم کرنے کے لئے پرعزم ہے۔دورے کے دوران نالندہ کے ضلع مجسٹریٹ نے چیف سکریٹری کو کیمپس کے ارد گرد جاری ترقیات اور بنیادی ڈھانچے کے بارے میں آگاہ کیا۔اختتام پر، چیف سکریٹری نے یونیورسٹی کے روشن مستقبل کی خواہش کرتے ہوئے کہا کہ یہ ادارہ مستقبل میں جنوب مشرقی ایشیا اور دیگر ممالک کے ساتھ ہندوستان کے تعلیمی تعلقات کو مزید مضبوط کرے گا۔چیف سکریٹری نے مزید کہاکہ حکومت نالندہ یونیور سیٹی کے فخریہ ماضی کو حاصل کرنے کے لئے کوشاں ہیں اور اس سمت میں کئی مثبت اقدامات اٹھائے گئے ہیں۔ نالندہ یونیورسیٹی کی ترقی اور مزید سہولیات فراہم کرنے کیلئے حکومت پرعزم ہے۔