عظیم آباد: ملک میں مسلمانوں کی موجودہ صورتِ حال تعلیمی پسماندگی، قومی یکجہتی مساجد و مقابر کے تحفظ یکساں سول کوڈ (یو سی سی) اور اقلیتوں کے حقوق سے متعلق دیگر اہم و حساس مسائل پر 27 ستمبر کو عظیم آباد میں ایک عظیم الشان اجلاس منعقد کیا جائے گا۔ اجلاس میں ملک کے موجودہ حالات کے تناظر میں مسلمانوں کو درپیش مسائل پر سنجیدہ گفتگو کے ساتھ ان کے آئینی و جمہوری حقوق کے تحفظ کے لیے مؤثر اقدامات پر بھی غور کیا جائے گا۔اجلاس میں ملک کے مختلف اہم مسائل اور مسلمانوں کی تعلیمی، سماجی اور سیاسی صورتِ حال پر مقررین اپنے خیالات کا اظہار کریں گے۔ پروگرام سے سابق رکن پارلیامنٹ اور معروف بے باک مقرر مولانا عبید اللہ خان اعظمی کے علاوہ ڈاکٹر اسماء زہراء، ڈاکٹر انیس احمد، ڈاکٹر پروفیسر آفتاب عالم، ارم ربانی اور سلیم خان خطاب کریں گے۔ مقررین مسلمانوں کی تعلیمی پسماندگی، سماجی مسائل، قومی یکجہتی اور اقلیتوں کے حقوق سے متعلق مختلف پہلوؤں پر روشنی ڈالیں گے۔
اجلاس کے کنوینر اور بہار کے سابق رکن اسمبلی و تخمینہ کمیٹی کے چیئرمین ڈاکٹر اظہار احمد نے پروگرام کی تیاریوں کا جائزہ لیتے ہوئے کہا کہ موجودہ نامساعد حالات میں اقلیتوں کو متعدد مسائل اور چیلنجز کا سامنا ہے۔ ایسے وقت میں ضروری ہے کہ اقلیتوں کے مسائل کو سنجیدگی سے سامنے لایا جائے اور ان کے حل کے لیے اجتماعی سطح پر غور و فکر کیا جائے۔انہوں نے کہا کہ اجلاس کا مقصد کسی خاص طبقے کے خلاف ماحول بنانا نہیں، بلکہ مسلمانوں سمیت تمام اقلیتوں کے آئینی حقوق، قومی یکجہتی اور باہمی بھائی چارے کے فروغ سے متعلق مسائل پر بامعنی گفتگو کرنا ہے۔ انہوں نے کہا کہ تعلیمی پسماندگی کا خاتمہ، مذہبی مقامات کا تحفظ اور ملک کے آئینی و جمہوری نظام میں اقلیتوں کی مؤثر شرکت جیسے مسائل پر سنجیدہ توجہ کی ضرورت ہے۔
ڈاکٹر اظہار احمد نے مسلمانوں سے اپیل کی کہ وہ 27 ستمبر کو منعقد ہونے والے اس اہم اجلاس میں زیادہ سے زیادہ تعداد میںشریک ہوکر ملک کے موجودہ حالات میں اپنے مسائل اور حقوق کے حوالے سے ہونے والی اس اجتماعی گفتگو کا حصہ بنیں۔ انہوں نے کہا کہ اجلاس میں پیش کیے جانے والے خیالات اور تجاویز کو مستقبل کے لیے ایک مثبت اور تعمیری سمت دینے کی کوشش کی جائے گی۔گورنمنٹ اردو لائبریری کے سابق چیئرمین ارشد فیروز نے کہا کہ وقت کا تقاضہ ہے کہ اقلیتوں کے مسائل بر بیباک گفتگو ہونی چاہیے اور ایوان میں بیٹھے لوگوں تک ہماری بات پہنچنی چاہیے تاکہ بروقت مسائل حل ہوسکے۔ جائزہ میٹنگ میں باری اعظمی ‘ نواب عتیق الزماں ‘ ڈاکٹر عبد الباسط حمیدی ‘ ڈاکٹر نعمان قیصر ‘ اظہر الحق ‘ شاہد الحق ‘ محمد حسنین ‘ پرویز عالم ‘ اکبر علی ‘ ساجد علی خان محمد رفیع وغیرہ بھی موجود رہے ۔