سمستی پور، 27 جون(خورشید عالم)۔ ضلع کے کلیان پور تھانہ علاقے میں محرم کے جلوس اور کھیل کے دوران ایک نوجوان کو چاقو مار کر ہلاک کر دیا گیا۔ متوفی کی شناخت محمد جبار انصاری (22) ولد محمد جاوید ساکن باسو دیو پور بھٹہ چوک گوپال پور وارڈ نمبر 9 رہائشی کے طور پر ہوئی ہے۔ جمعہ کی شام کسی بات کو لیکر دوسرے فریق کے نوجوان سے ہوئی کہا سنی کے بعد یہ واقعہ پیش آیا جس سے علاقے میں خوف و ہراس پھیل گیا۔ واقعہ کی اطلاع ملتے ہی پولیس نے تفتیش شروع کر دی اور ملزم کی تلاش کے لیے چھاپہ ماری کر رہی ہے۔ مقامی لوگوں میں ناراضگی ہے۔ انتظامیہ نے صورتحال پر قابو پانے کے لیے ضروری اقدامات کیے ہیں۔ متوفی کے اہل خانہ غم میں ہیں اور انہوں نے ملزم کے خلاف سخت کارروائی کا مطالبہ کیا ہے۔ پولیس ذرائع نے ہفتہ کو بتایا کہ گوپال پور بھٹا چوک پر جمعہ کی رات محرم کا جلوس نکالا جا رہا تھا، اسی دوران پرانے تنازع کو لے کر محمد جاوید (22) کی کچھ نوجوانوں سے کہا سنی ہو گئی۔ تنازع بڑھنے پر ملزمان نے محمد جاوید پر چاقو سے حملہ کر دیا جس سے اس کی موقع پر ہی موت ہو گئی۔ واقعے کے بعد ملزمان فرار ہو گئے۔
ذرائع نے بتایا کہ لاش کو پوسٹ مارٹم کے لیے سمستی پور صدر اسپتال بھیج دیا گیا ہے۔ پولیس واقعے میں ملوث ملزمان کی گرفتاری کے لیے ممکنہ ٹھکانوں پر لگاتار چھاپے ماری کر رہی ہے۔ احتیاط کے طور پر جائے وقوعہ کے آس پاس پولیس فورس تعینات کر کے نگرانی بڑھا دی گئی ہے۔
دوسرا واقعہ متھرا پور تھانہ علاقہ کے رام نگر ساری گاؤں میں پیش آیا جہاں محرم کے جلوس کے دوران دو گروپوں کے درمیان جھگڑا شروع ہوگیا۔ جھگڑا تیزی سے پرتشدد لڑائی میں بدل گیا، جس سے علاقے میں کشیدگی پھیل گئی۔ تصادم کی اطلاع پر ردعمل ظاہر کرتے ہوئے جائے وقوعہ پر پہنچی پولیس اور انتظامیہ کی ٹیم پر مشتعل ہجوم نے لاٹھیوں سے حملہ کر دیا۔ حملے میں تین پولیس اہلکار زخمی ہوئے ہیں جنہیں سمستی پور صدر اسپتال میں داخل کرایا گیا ہے۔ زخمی اہلکاروں کا علاج جاری ہے۔ واقعہ کی سنگینی کو دیکھتے ہوئے ضلع کے مختلف تھانوں سے اضافی پولیس دستے رام نگر ساری گاؤں بھیجے گئے۔ بڑی تعداد میں پولیس اہلکاروں کی تعیناتی کے بعد صورتحال قابو میں ہے۔ احتیاط کے طور پر علاقے میں پولیس فورس مسلسل تعینات ہے اور حساس مقامات پر نگرانی بڑھا دی گئی ہے۔
ضلع پولیس کے سپرنٹنڈنٹ اروند پرتاپ سنگھ نے بتایا کہ پولیس ٹیم پر حملہ کرنے والوں کی تلاش جاری ہے۔ گاؤں میں کشیدگی کو دیکھتے ہوئے کسی بھی قسم کی امن و امان کی خرابی کو روکنے کے لیے بھاری پولیس فورس کو تعینات کیا گیا ہے۔ انہوں نے دونوں فریقوں سے امن برقرار رکھنے کی اپیل کی۔ دونوں واقعات کے بعد سمستی پور ضلع میں سیکورٹی سخت کر دی گئی ہے۔ محرم کی بقیہ تقریبات کے دوران اضافی چوکسی برقرار رکھی جارہی ہے۔ انتظامیہ کسی بھی قسم کے ناخوشگوار واقعہ کو روکنے اور امن و امان برقرار رکھنے کے لیے کوشاں ہے۔