گذشتہ ماہ 28 فروری کو شروع ہونے والی جنگ کے دسویں روز، اسرائیلی فوج نے ایران کے اندر اپنے حملوں کو دوبارہ شروع کیا۔فوج نے آج پیر کو ایک مختصر بیان میں اعلان کیا کہ اس نے ایران کے وسطی علاقوں میں حملوں کی ایک نئی لہر شروع کی ہے۔ اس نے ٹیلی گرام پر ایک پوسٹ میں کہا کہ اس نے ایرانی نظام کے بنیادی ڈھانچے پر حملوں کی ایک اضافی لہر شروع کی ہے۔اس نے مزید کہا کہ اس نے بیلسٹک میزائل لانچنگ پلیٹ فارمز کے ساتھ ساتھ داخلی سکیورٹی فورسز اور باسیج کے ہیڈ کوارٹرز پر حملہ کیا ہے۔ اس نے اصفہان میں داخلی سکیورٹی فورسز کے ہیڈ کوارٹر کو نشانہ بنانے کی طرف بھی اشارہ کیا۔جبکہ ملک کے جنوب میں واقع ایرانی شہر بندر عباس ایئر بیس پر دو میزائلوں سے حملے کی اطلاع ملی ہے جس کے نتیجے میں شدید دھماکے ہوئے۔
ایرانی میڈیا کے مطابق شہر اصفہان میں کئی مقامات، تہران کے دیگر علاقوں اور ملک کے شمال مغرب میں واقع شہر زنجان میں شدید فضائی حملے ریکارڈ کیے گئے۔ اسی طرح گولہ باری تہران کے جنوب مغرب میں واقع شہر رے کے علاقے تک بھی پہنچی۔اس کے جواب میں، ایرانی فوج نے اپنی دھمکیاں دہرائیں اور ایرانی ہیڈ کوارٹر نے کہا کہ "کمانڈر مجتبیٰ خامنئی کی قیادت میں ہم امریکہ اور دیگر دشمنوں کو اپنے خلاف کسی بھی جارحیت پر پچھتانے پر مجبور کر دیں گے۔دوسری طرف پاسداران انقلاب ایران نے نئے سپریم لیڈر سے اپنی وفاداری کا اعلان کیا۔
سرکاری میڈیا کی طرف سے نشر کیے گئے ایک بیان میں کہا گیا کہ پاسداران انقلاب، سپریم لیڈر کے ایک مضبوط سپاہی اور بازو کی حیثیت سے، لیڈر مجتبیٰ خامنئی کے احکامات پر عمل کرنے کے لیے تیار ہے، ساتھ ہی ساتھ مجلس خبرگان کے انتخاب کی بھی حمایت کرتا ہے۔
ایران اس سے قبل اسرائیل کی جانب مزید میزائل داغ چکا تھا۔ جبکہ العربیہ/الحدث کی نامہ نگار نے کریات شمونہ اور اس کے مضافات اور بالائی گلیل میں سائرن بجنے کی اطلاع دی۔اسی اثنا میں، کئی خلیجی ممالک نے اپنی سرزمین کے اوپر ڈرونز اور میزائلوں کو ناکام بنانے کا اعلان کیا۔ بحرین نے اشارہ کیا کہ اتوار اور پیر کی درمیانی شب جزیرہ سترہ پر ایرانی ڈرون حملے کے نتیجے میں 32 افراد زخمی ہوئے۔اسی طرح قطر کے دارالحکومت دوحہ میں دھماکوں کی آوازیں سنی گئیں۔ یہ اطلاع فرانسیسی خبر رساں ادارے نے دی۔ قطری وزارت دفاع نے اعلان کیا کہ اس کی افواج نے ایک میزائل حملے کو ناکام بنا دیا ہے۔کویتی وزارت دفاع نے بھی ملک پر میزائلوں اور ڈرونز کے نئے حملے کا اعلان کیا اور تصدیق کی کہ فضائی دفاعی نظام نے ایرانی بیلسٹک اور کروز میزائلوں اور ڈرونز کا مقابلہ کیا۔ واضح رہے کہ حکام کی جانب سے شائع کردہ اعداد و شمار کے مطابق کویت کو سات میزائلوں اور پانچ ڈرونز سے نشانہ بنایا گیا تھا۔سعودی عرب میں، وزارت دفاع نے دو ڈرونز کو مار گرانے کا اعلان کیا جو ملک کے جنوب مشرق میں شیبہ آئل فیلڈ کی طرف جا رہے تھے۔
یہ سب ایسے وقت میں ہو رہا ہے جب جنگ کے مزید کئی ہفتوں تک جاری رہنے کی توقعات ہیں۔ اسرائیلی فوج کے تخمینوں کے مطابق ایران کے خلاف جنگ کم از کم ایک ماہ تک جاری رہے گی۔ یہ بات اسرائیلی اخبار یدیعوت آحرونوت اخبار نے اپنی رپورٹ میں بتائی۔دوسری جانب امریکی صدر ڈونلڈ ٹرمپ نے پہلے ہی اشارہ دیا تھا کہ ایران میں اہداف کا حصول کئی ہفتوں کا وقت لے سکتا ہے۔جبکہ امریکی وزیر دفاع پیٹ ہیگسیٹھ نے بڑے فوجی تصادم کی دھمکی دیتے ہوئے کہا کہ تہران پر ہمارے حملے تیز ہوں گے۔ انہوں نے اس کے ساتھ ہی اس بات کی تصدیق کی کہ فوجی آپریشن منصوبے کے مطابق آگے بڑھ رہا ہے۔اس کے جواب میں ایرانی پاسداران انقلاب نے کل زور دے کر کہا کہ وہ جنگ جاری رکھنے کے لیے تیار ہے۔ انھوں نے دعویٰ کیا کہ اس کے پاس 6 ماہ تک لڑائی جاری رکھنے کی مکمل تیاری اور صلاحیت موجود ہے۔