پٹنہ، 15 اگست :بہار کے وزیر اعلیٰ سمراٹ چودھری نے آج 80ویں یومِ آزادی کے موقع پر پٹنہ ضلع کے تحت دھنروآ بلاک کی ندواں پنچایت میں واقع گاؤں ندواں کے مہادلت ٹولہ میں منعقدہ پرچم کشائی کی تقریب میں شرکت کی۔ وزیر اعلیٰ مسٹر چودھری نے بہار کے عوام کو 80ویں یومِ آزادی کی دلی مبارکباد اور نیک خواہشات پیش کرتے ہوئے کہا کہ آج کا دن ان لاتعداد مجاہدینِ آزادی کو یاد کرنے کا موقع ہے، جنہوں نے ملک کی آزادی کے لیے اپنی زندگیاں وقف کر دیں۔ انہوں نے کہا کہ بہار کی سر زمین نے بھی کئی عظیم سپوت دیے ہیں، جنہوں نے ملک کی آزادی اور سماجی انصاف کے لیے اپنا تعاون دیا، ان تمام مجاہدینِ آزادی کو خراجِ عقیدت پیش کرتے ہیں۔
وزیر اعلیٰ نے کہا کہ ندواں کے مہادلت ٹولہ میں آکر یوم آزادی کے موقع پر منعقدہ پروگرام میں شرکت کرنا خوشی کی بات ہے۔
مسٹر چودھری نے کہا کہ ندواں مہادلت ٹولہ میں آنگن واڑی مرکز کی عمارت اور کمیونٹی ہال کی تعمیر کے لیے 12-12 لاکھ روپے کی منظوری دی گئی ہے۔ ہائی اسکول ندواں کے کھیل کے میدان کی تزئینِ کاری کے لیے ایک کروڑ سات لاکھ روپے کی رقم منظور کی گئی ہے۔ پنچایت سرکار مکانات کی تعمیر کے لیے تقریباً 2.50 کروڑ روپے اور کنیا وواہ منڈپ کے لیے 50 لاکھ روپے کا منصوبہ منظور کیا گیا ہے۔ ندواں ہائی اسکول کو ماڈل اسکول کے طور پر تیار کیا جائے گا۔ انہوں نے کہا کہ وزیر اعظم نریندر مودی ہندستان کو ترقی یافتہ اور مضبوط بنانے کے لیے مسلسل کام کر رہے ہیں۔ سابق وزیر اعلیٰ نیتش کمار نے بھی بہار کی ترقی اور خوشحالی کے لیے کئی اہم کام کیے ہیں۔ ان دونوں کے خوابوں کو شرمندۂ تعبیر کرنا ہمارا فرض ہے اور اس کے لیے ریاستی حکومت مسلسل کوشاں ہے۔ انہوں نے کہا کہ ترنگا صرف ہماری آزادی اور فخر کی علامت نہیں ہے، بلکہ یہ ہمیں اپنے فرائض کے تئیں ہمیشہ بیدار رہنے کی ترغیب دیتا ہے۔ آج ہم سیاسی آزادی کے ساتھ ساتھ یہ عزم بھی لیں کہ معاشرے کے ہر طبقے، بالخصوص مہادلت، درج فہرست ذاتوں، درج فہرست قبائل اور انتہائی پسماندہ طبقے کے لوگوں تک ترقی کی روشنی مساوی طور پر پہنچے۔