پٹنہ: (اے بی این ) یوم آزادی سے قبل بہار میں حب الوطنی اور قومی یکجہتی کی لہر کو مزید تیز کرنے کے لیے ’ہر گھر ترنگا مہم2026‘ کو بڑے پیمانے پر عوامی تحریک بنانے کی تیاری مکمل کر لی گئی ہے۔ مہم کے تحت 10 اگست کو پٹنہ میں عظیم الشان ’ترنگا یاترا‘ نکالی جائے گی، جس کی قیادت وزیر اعلیٰ سمراٹ چودھری کریں گے۔ صبح 10 بجے جے پی گولمبر سے شروع ہونے والی یہ یاترا کارگل چوک تک جائے گی، جس میں ریاست کے وزراء، افسران اور بڑی تعداد میں عوام کی شرکت متوقع ہے۔اس سلسلے میں آرٹ اینڈ کلچر محکمہ کے وزیر ڈاکٹر پرمود کمار نے پریس کانفرنس کرکے مہم کی تیاریوں اور ریاست بھر میں ہونے والے پروگراموں کی تفصیلات پیش کیں۔ انہوں نے کہا کہ ’ہر گھر ترنگا‘ محض ایک سرکاری پروگرام نہیں بلکہ قومی فخر، اتحاد، قربانی اور عوامی شراکت کا جشن ہے، جس کا مقصد ہر شہری کو قومی پرچم سے جذباتی طور پر جوڑنا ہے۔
وزیر کے مطابق 10 اگست 2026 کو صبح 10 بجے وزیراعلیٰ سمراٹ چودھری کی قیادت میں ترنگا یاترا جے پی گولمبر سے روانہ ہو کر کارگل چوک تک پہنچے گی۔یاترا کے دوران قومی پرچم کے ساتھ حب الوطنی اور قومی یکجہتی کا پیغام عام کیا جائے گا۔ تمام وزراء اور اعلیٰ افسران بھی پروگرام میں موجود رہیں گے۔وزیر نے کہا کہ ہندوستان کا ترنگا کروڑوں ہندوستانیوں کی قربانی، جدوجہد، حب الوطنی اور قومی وقار کی علامت ہے۔ ’ہر گھر ترنگا‘ مہم کا مقصد اسی جذبے کو ہر گھر اور ہر دل تک پہنچانا ہے۔
ریاست کے ہر ضلع اور بلاک میں مہم کے مؤثر نفاذ کا منصوبہ تیار کیا گیا ہے۔ اس کے تحت ہر بلاک کو 4 ہزار قومی پرچم فراہم کیے جائیں گے۔ ترنگوں کی فراہمی جیواِکا کے ذریعے کی جائے گی۔اسکولوں، کالجوں، سرکاری و عوامی اداروں اور دیگر مقامات پر شہریوں کی زیادہ سے زیادہ شرکت یقینی بنانے کی ہدایت دی گئی ہے۔
وزیر نے بتایا کہ پروگرام کی کامیابی کے لیے چیف سکریٹری کی صدارت میں جائزہ میٹنگ کرکے مختلف محکموں کی ذمہ داریاں طے کی گئی ہیں۔ یاترا کے راستے کا مشترکہ معائنہ مکمل کر لیا گیا ہے اور پورے روٹ پر بیریکیڈنگ اور ترنگا تھیم پر سجاوٹ کی جا رہی ہے۔سکیورٹی کے پیش نظر روٹ کی جانچ، مناسب تعداد میں پولیس فورس اور مجسٹریٹوں کی تعیناتی، ٹریفک مینجمنٹ، بھیڑ پر قابو پانے اور ہنگامی صورت حال میں محفوظ انخلا کے انتظامات بھی کیے گئے ہیں۔
ڈاکٹر پرمود کمار نے بہار کے عوام سے اپیل کی کہ وہ 10 اگست کی ترنگا یاترا میں زیادہ سے زیادہ تعداد میں شریک ہوں اور 9 سے 17 اگست تک جاری رہنے والی ’ہر گھر ترنگا‘ مہم کو عوامی تحریک بنانے میں اپنا کردار ادا کریں۔انہوں نے شہریوں سے اپیل کی کہ وہ اپنے گھروں، کاروباری اداروں اور دفاتر پر قومی پرچم کو پورے احترام کے ساتھ لہرائیں اور نوجوانوں سے خاص طور پر مہم میں فعال کردار ادا کرنے کی اپیل کی۔انہوں نے کہا کہ قومی پرچم کے احترام اور ملک سے محبت کا پیغام معاشرے کے ہر طبقے تک پہنچانا ہم سب کی مشترکہ ذمہ داری ہے۔
وزیر نے میڈیا نمائندوں سے بھی اپیل کی کہ وہ ’ہر گھر ترنگا‘ مہم کے پیغام کو زیادہ سے زیادہ لوگوں تک پہنچانے میں تعاون کریں۔ انہوں نے کہا کہ میڈیا کی مثبت اور فعال شراکت سے مہم کو مزید مؤثر اور عوامی بنایا جا سکتا ہے۔