پٹنہ، 11 اکتوبر(اے بی این) وزیر اعلیٰ سمراٹ چودھری نے اتوار کو نہرو پتھ پر جاری پٹنہ میٹرو ریل پروجیکٹ کے تعمیراتی کاموں کا جائزہ لیا۔ اس دوران انہوں نے انکم ٹیکس گولمبر، ہائی کورٹ چوراہا اور ہنومان مندر کے قریب تعمیراتی مقامات کا معائنہ کیا اور متعلقہ افسران سے کاموں کی پیش رفت کی تفصیلات حاصل کیں۔ انہوں نے افسران کو ہدایت دی کہ میٹرو پروجیکٹ کی تعمیر سال 2028 تک مکمل کی جائے اور اس دوران معیار و حفاظت کے تمام مقررہ ضابطوں پر سختی سے عمل کیا جائے۔معائنے کے دوران وزیر اعلیٰ نے نہرو پتھ پر شہریوں کی آمدورفت کو آسان بنانے کے لیے جے ڈی ویمنس کالج اور ہائی کورٹ چوراہا سے بہار میوزیم کے درمیان فٹ اوور برج تعمیر کرنے کی بھی ہدایت دی۔ انہوں نے کہا کہ میٹرو کی تعمیر کے ساتھ عوامی سہولتوں کا خیال رکھنا بھی ضروری ہے، اس لیے تعمیراتی کام اس انداز میں انجام دیے جائیں کہ لوگوں کی روزمرہ آمدورفت کم سے کم متاثر ہو۔وزیر اعلیٰ نے تعمیراتی مقامات کے آس پاس ٹریفک کے بہتر انتظام اور شہریوں کی حفاظت کو ترجیح دینے پر زور دیتے ہوئے کہا کہ تمام متعلقہ محکمے اور تعمیراتی ایجنسیاں باہمی تال میل کے ساتھ کام کریں، تاکہ تعمیراتی سرگرمیوں کے دوران عام لوگوں کو غیر ضروری پریشانیوں کا سامنا نہ کرنا پڑے۔ انہوں نے افسران کو تعمیراتی کاموں کی باقاعدہ نگرانی کرنے اور پروجیکٹ کی پیش رفت میں تیزی لانے کی ہدایت بھی دی۔انہوں نے پٹنہ میٹرو ریل پروجیکٹ کو راجدھانی کے ٹرانسپورٹ نظام کے لیے اہم قرار دیتے ہوئے واضح کیا کہ تعمیراتی کاموں کی رفتار بڑھانے کے ساتھ معیار، حفاظت اور شہری سہولتوں کے معاملے میں کسی بھی طرح کا سمجھوتہ نہیں کیا جانا چاہیے۔ ان کا کہنا تھا کہ بہتر منصوبہ بندی اور محکموں کے درمیان مؤثر تال میل سے ہی پروجیکٹ کو مقررہ مدت میں مکمل کیا جا سکتا ہے۔معائنے کے دوران نائب وزیر اعلیٰ وجے کمار چودھری، کوآپریٹو وزیر رام کرپال یادو، سائنس، ٹیکنالوجی اور تکنیکی تعلیم کی وزیر شیلا کماری سمیت مختلف محکموں کے سینئر افسران موجود تھے۔ ان میں پرنسپل سکریٹری ونئے کمار، پنکج کمار پال، وزیر اعلیٰ کے سکریٹری لوکیش کمار سنگھ، پٹنہ میٹرو کے منیجنگ ڈائریکٹر سندیپ کمار آر۔ پڈوکل کٹی، پرنو کمار، انیمیش کمار پراسر، پٹنہ کے ضلع مجسٹریٹ کندن کمار اور سینئر سپرنٹنڈنٹ آف پولیس کارتیکے کے شرما شامل تھے۔