وزیر اعلیٰ جناب سمراٹ چودھری نے آج پٹنہ کے رویندر بھون میں اسپک مکے کے زیر اہتمام تین روزہ ’’درگا سوروُتسو-2026‘‘ کا شمع روشن کرکے افتتاح کیا۔ اس موقع پر وزیر اعلیٰ نے کہا کہ آج کی تیز رفتار زندگی میں لوگوں کی فن اور موسیقی کے تئیں دلچسپی کم ہوتی جا رہی ہے۔ کلاسیکی موسیقی سے بھی لوگوں کی دوری بڑھی ہے۔ ایسے میں اپنے شاندار ثقافتی ورثے کو محفوظ رکھنا اور اسے اگلی نسل تک پہنچانا انتہائی ضروری ہے۔وزیر اعلیٰ نے کہا کہ ثقافتی پروگراموں کے تحفظ، حوصلہ افزائی اور انہیں مسلسل آگے بڑھانے کے لیے ایک مضبوط نظام تیار کرنے کی ضرورت ہے۔ کلاسیکی موسیقی ہماری شاندار ثقافتی روایت کا اہم حصہ ہے۔ اگر ہمیں ذہنی سکون حاصل کرنا ہے تو کلاسیکی موسیقی کو اپنی زندگی کا حصہ بنانا ہوگا۔ موسیقی کا انسان کی ذہنی اور جذباتی صحت پر بھی مثبت اثر پڑتا ہے۔وزیر اعلیٰ نے کہا کہ ہائی اسکولوں اور کالجوں میں طلبہ کو کلاسیکی موسیقی سے جوڑنے کی سمت میں کام کرنے کی ضرورت ہے۔ طلبہ کی زندگی میں کلاسیکی موسیقی کی افادیت بڑھانے کے لیے ضروری اقدامات کیے جانے چاہئیں۔ اس سے طلبہ کو ذہنی سکون حاصل کرنے اور نشے کی لت سے دور رہنے میں مدد مل سکتی ہے۔ انہوں نے کہا کہ بہار کے دیگر مقامات پر بھی اس طرح کے کلاسیکی موسیقی کے پروگرام منعقد کیے جانے چاہئیں۔ بہار میں کلاسیکی موسیقی کو مزید فروغ دینے، فنکاروں کی حوصلہ افزائی کرنے اور نئی نسل کو ہندوستانی کلاسیکی موسیقی کی روایت سے جوڑنے کے لیے حکومت تعاون کرے گی۔
وزیر اعلیٰ نے پروگرام کی منتظم ڈاکٹر مایا شنکر کو مبارک باد دیتے ہوئے کہا کہ وہ کلاسیکی موسیقی کے ایسے پروگراموں کے ذریعے بہار میں فن اور ثقافت کو فروغ دینے کا کام مسلسل جاری رکھیں۔ اس طرح کے پروگرام ہمارے ثقافتی ورثے کو محفوظ رکھنے اور سماج میں موسیقی کے تئیں دلچسپی پیدا کرنے میں اہم کردار ادا کرتے ہیں۔اس موقع پر وزیر اعلیٰ نے مشہور کلاسیکی گلوکار جناب ساجن مشرا کی موسیقی کی پیش کش بھی سنی۔اس موقع پر فنون اور ثقافت کے وزیر ڈاکٹر پرمود کمار، رکن پارلیمنٹ جناب روی شنکر پرساد، بی جے پی کے ریاستی صدر اور رکن اسمبلی جناب سنجے سراوگی، سابق نائب وزیر اعلیٰ اور رکن اسمبلی جناب تارکیشور پرساد، رکن اسمبلی جناب سنجیو چورسیا، رکن اسمبلی جناب سنجے کمار، قانون ساز کونسل کے رکن جناب سنجے میوکھ، پٹنہ کی میئر محترمہ سیتا ساہو، ڈپٹی میئر محترمہ ریشمی چندرونشی سمیت دیگر عوامی نمائندے اور معزز شخصیات موجود تھیں۔