پٹنہ، یکم ستمبر (اے بی این) بہار اسمبلی میں اپوزیشن کے رہنما اور راشٹریہ جنتا دل (آر جے ڈی) کے کارگزار قومی صدر تیجسوی پرساد یادو نے منگل کو کہا کہ ڈیموکریٹک الائنس (این ڈی اے) کے رہنما اپنی خاندانی سیاست کو مضبوط کرنے کے لیے تحفظات کا فائدہ اٹھا رہے ہیں اور بی جے پی اور راشٹریہ سنگھ کے اراکین کو خوش رکھنے پر زیادہ توجہ مرکوز کر رہے ہیں۔ آج نامہ نگاروں سے خطاب کرتے ہوئے آر جے ڈی لیڈر نے چراغ پاسوان، جیتن رام مانجھی، رام داس اٹھاولے اور اوم پرکاش راج بھر سے سوال کیا کہ ملک بھر کی عدلیہ میں دلت برادری سے صرف 10 جج کیوں ہیں۔ انہوں نے کہا کہ ملک بھر کی یونیورسٹیوں میں صرف 20 وائس چانسلر اور مرکزی سطح پر سکریٹری سطح کے 10 عہدیدار دلت برادری سے ہیں۔ انہوں نے کہا کہ اعداد و شمار بتاتے ہیں کہ این ڈی اے میں شامل یہ نام نہاد سرکردہ دلت لیڈر برادری کی بہتری کے بارے میں کتنے سنجیدہ ہیں۔ انہوں نے کہا کہ یہ تمام لیڈر اقتدار اور مفاد کی سیاست میں اس قدر مست ہیں کہ وہ تحفظات میں اضافے پر کبھی بحث نہیں کرتے اور نہ ہی مرکزی حکومت پر دباؤ ڈالتے ہیں۔ مسٹر یادو نے کہا کہ چراغ پاسوان اور جیتن رام مانجھی سمیت تمام دلت لیڈروں کو اقتدار اور مفاد کی سیاست کو چھوڑ کر دلتوں کی ترقی پر توجہ مرکوز کرنی چاہیے۔ وہ اپنی مخصوص نشستوں سے مستعفی ہو کر جنرل نشستوں پر الیکشن لڑیں۔
اسمبلی میں اپوزیشن لیڈر نے کہا کہ نیشنل ڈیموکریٹک الائنس (این ڈی اے) کے قائدین بشمول سابق چیف منسٹر نتیش کمار کو بہار میں 75 فی صد ریزرویشن کو نویں شیڈول میں شامل کرنے کے لئے مرکزی حکومت پر دباؤ ڈالنا چاہئے۔ مسٹر یادو نے کہا کہ حکمراں اتحاد میں حلیف ہونے کے باوجود نتیش کمار، جیتن رام مانجھی، چراغ پاسوان، اور اپیندر کشواہا بہار میں تحفظات کو بڑھانے میں سنجیدہ نہیں ہیں۔ انہوں نے کہا کہ یہ تمام لیڈر صرف بی جے پی اور آر ایس ایس کے خیالات کو تقویت دے رہے ہیں۔ اسمبلی میں اپوزیشن لیڈر نے کہا کہ بہار میں گرینڈ الائنس حکومت نے ذات پات کی مردم شماری کرانے کے بعد پسماندہ، انتہائی پسماندہ، دلت اور قبائلی برادریوں کے لیے ریزرویشن کی حد کو بڑھا کر 65 فی صد کرنے کا فیصلہ کیا ہے۔ اس نے مرکزی حکومت کو نویں شیڈول میں 75فی صد ریزرویشن کے ساتھ ساتھ معاشی طور پر کمزور طبقات (ای ڈبلیو ایس) کے لیے 10فی صد ریزرویشن شامل کرنے کی تجویز بھی بھیجی۔ انہوں نے مزید کہا کہ این ڈی اے کی اتحادی پارٹی کے قائدین بعد میں اس مسئلہ پر مرکزی حکومت پر دباؤ ڈالنے میں ناکام رہے جس کی وجہ سے اس تجویز کو روک دیا گیا۔