پٹنہ، 30 دسمبر (اے بی این ) وزیر زراعت رام کرپال یادو نے منگل کو کہا کہ زرعی روڈ میپ کے تحت فارم مشینری بینک قائم کیے جا رہے ہیں، جس کے ذریعے کسانوں کو کھیتی کے ہر مرحلے میں جدید زرعی آلات بروقت اور آسانی سے دستیاب ہو سکیں گے۔
وزیر زراعت نے آج ایک بیان جاری کر کہا کہ بہار حکومت کا واضح عزم ہے کہ ریاست کا ہر کسان، بالخصوص چھوٹے اورمعمولی کسان، جدید، سائنسی اور منافع بخش کھیتی سے جڑ سکے۔ اسی مقصد کے تحت زرعی روڈ میپ کے تحت فارم مشینری بینک قائم کیے جا رہے ہیں تاکہ کسانوں کو کھیتی کے تمام مراحل میں جدید زرعی مشینری بروقت میسر آ سکے۔
انہوں نے کہا کہ جوتائی سے لے کر بوائی، روپنی، کٹائی اور تھریشنگ تک کھیتی کی ہر اہم سرگرمی میں وقت کی بڑی اہمیت ہوتی ہے۔ فارم مشینری بینک کے ذریعے جدید زرعی آلات کی دستیابی یقینی ہوگی، جس سے نہ صرف کھیتی کی لاگت میں کمی آئے گی بلکہ فصل کے معیار اور پیداوار میں بھی نمایاں اضافہ ہوگا۔ یہ منصوبہ کسانوں کی محنت کو عزت دینے اور انہیں خودکفیل بنانے کی سمت ایک مضبوط قدم ہے۔
رام کرپال یادو نے بتایا کہ فارم مشینری بینک کے قیام کے لیے زیادہ سے زیادہ 10 لاکھ روپے کی پروجیکٹ لاگت مقرر کی گئی ہے۔ مقامی فصلوں کے نظام کو مدنظر رکھتے ہوئے جوتائی، بوائی/روپنی، ہارویسٹنگ اور تھریشنگ سے متعلق ہر زرعی عمل کے لیے کم از کم ایک ایک جدید مشین شامل کرنا لازمی ہوگا۔ اس منصوبے کے تحت کل پروجیکٹ لاگت کا 80 فیصدتک، زیادہ سے زیادہ 8 لاکھ روپے کی سبسڈی ریاستی حکومت کی جانب سے فراہم کی جا رہی ہے تاکہ کسانوں اور کسان گروپوں پر مالی بوجھ نہ پڑے۔ انہوں نے کہا کہ مالی سال 2025-26 میں ریاست کے ہر ضلع میں ایک ایک فارم مشینری بینک قائم کرنے کا ہدف طے کیا گیا ہے۔ اس طرح بہار بھر میں کل 38 فارم مشینری بینک قائم کیے جائیں گے، جس سے زرعی میکانائزیشن کو نئی رفتار ملے گی اور بروقت کھیتی کو فروغ حاصل ہوگا۔
وزیرِ زراعت کے مطابق اس منصوبے سے جیویکا کے سیلف ہیلپ گروپس، گرام سنگٹھن، کلسٹر فیڈریشن، آتما سے منسلک فارمر انٹرسٹ گروپس، نابارڈ یا قومی بینکوں سے وابستہ کسان کلب، کسان پیداوار تنظیمیں، کسان پیداوار کمپنیاں، سیلف ہیلپ گروپس اورپیکس کو فائدہ پہنچے گا۔
رام کرپال یادو نے کہا کہ فارم مشینری بینک اسکیم بہار میں جدید، مشینی اور پائیدار زرعی نظام کی مضبوط بنیاد رکھے گی۔ اس سے نہ صرف کسانوں کی آمدنی میں اضافہ ہوگا بلکہ دیہی معیشت کو بھی تقویت ملے گی۔ انہوں نے امید ظاہر کی کہ یہ پہل بہار کو زرعی شعبے میں ایک نمایاں ریاست کے طور پر قائم کرنے میں اہم کردار ادا کرے گی۔