کانگریس نے بھارتیہ جنتا پارٹی (بی جے پی) حکومت پر خواتین کے استحصال کے واقعات پر خاموشی اختیار کرنے کا الزام لگاتے ہوئے کہا ہے کہ اتر پردیش کے ہاتھرس اجتماعی عصمت دری (گینگ ریپ) معاملے پر بنی ڈاکومینٹری میں کئی حقائق اور ثبوت سامنے آئے ہیں، لیکن اب تک اس معاملے میں کوئی ٹھوس کارروائی نہیں ہوئی ہے، اس لیے پورے معاملے کی دوبارہ جانچ کرائی جانی چاہیے۔ مہیلا کانگریس کی صدر الکا لامبا نے جمعرات کو یہاں پارٹی ہیڈکوارٹر میں پریس کانفرنس میں کہا کہ ہاتھرس میں 14 ستمبر 2020 کو ایک دلت دوشیزہ کے ساتھ اجتماعی عصمت دری کا واقعہ ہوا تھا اور 29 ستمبر کو اس کی موت ہو گئی تھی۔ انہوں نے الزام لگایا کہ 30 ستمبر کی آدھی رات کو پولیس نے خاندان کی رضامندی کے بغیر لاش کی آخری رسومات ادا کر دیں، جس سے پورے معاملے پر سنگین سوالات کھڑے ہوئے۔ انہوں نے کہا کہ پولیس اور انتظامیہ نے متاثرہ خاندان کی ایک نہ سنی نیز خاندان کے افراد کو مبینہ طور پر گھر میں محصور کر دیا گیا اور بیٹی کا چہرہ تک نہیں دیکھنے دیا گیا۔ محترمہ لامبا نے الزام لگایا کہ اس وقت لوک سبھا میں اپوزیشن کے لیڈر راہل گاندھی اور کانگریس کی جنرل سکریٹری پرینکا گاندھی واڈرا کو متاثرہ خاندان سے ملنے سے روکا گیا تھا۔ ان کا کہنا تھا کہ اگر اس وقت خاندان تک پہنچنے دیا گیا ہوتا تو انصاف کا عمل مختلف ہو سکتا تھا۔ کانگریس رہنما نے کہا کہ ہاتھرس معاملے پر بنی دستاویزی فلم میں شامل ایک ماہرِ امراضِ نسواں نے دعویٰ کیا ہے کہ متاثرہ کو ہسپتال لانے سے پہلے ثبوت مٹا دیے گئے تھے نیز اسے نہلایا اور صاف کیا گیا تھا۔ انہوں نے کہا کہ ڈاکومینٹری میں یہ بھی سامنے آیا ہے کہ متاثرہ لڑکی کی ریڑھ کی ہڈی (اسپائنل کارڈ) ٹوٹ گئی تھی اور اسے گھسیٹا گیا تھا، لیکن اسے ایمبولینس اور اسٹریچر تک فراہم نہیں کیا گیا۔ ان کا دعویٰ تھا کہ متاثرہ نے موت سے پہلے اپنے ساتھ ہوئے واقعے کی معلومات دی تھی، لیکن اس کے بیان کو کافی اہمیت نہیں دی گئی۔ محترمہ لامبا نے کہا کہ ہاتھرس جیسے سنگین معاملے میں پولیس کے کردار پر سوال اٹھے ہیں اور اگر وقت پر شواہد اکٹھے کیے گئے ہوتے نیز اہم ثبوت عدالت میں پیش کیے گئے ہوتے تو دوشیوں کو سزا مل سکتی تھی۔ انہوں نے سوال کیا کہ ڈاکومینٹری میں سامنے آئے حقائق کی بنیاد پر اتر پردیش پولیس اب تک کارروائی کیوں نہیں کر رہی ہے۔ انہوں نے کہا کہ دو مارچ 2023 کو عدالت نے اس معاملے کے چار ملزمان میں سے تین کو بری کر دیا تھا۔ کانگریس کا الزام ہے کہ معاملے کی جانچ کمزور کی گئی، جس کی وجہ سے انصاف متاثر ہوا۔
