پٹنہ، 15 جنوری (اے بی این) پٹنہ کے ضلع مجسٹریٹ و چیئرمین، ضلع سڑک تحفظ کمیٹی ڈاکٹر تیاگ راجن ایس ایم نے جمعرات کو کلکٹریٹ احاطہ، پٹنہ سے سڑک تحفظ بیداری رتھوں کو ہری جھنڈی دکھا کر روانہ کیا۔ اس موقع پر تقریباً 15 بیداری رتھ ضلع کے شہری اور دیہی علاقوں میں گھوم گھوم کر عوام کو ٹریفک قوانین کے تئیں بیدار کریں گے اور ان پر عمل کرنے کی ترغیب دیں گے۔ضلع مجسٹریٹ ڈاکٹر تیاگ راجن نے بتایا کہ سڑک تحفظ ماہ کا انعقاد یکم جنوری سے 31 جنوری تک کیا جا رہا ہے۔ انہوں نے کہا کہ بڑھتے ہوئے سڑک حادثات اور ان سے ہونے والی اموات کے معاملے میں انتظامیہ سنجیدہ ہے۔ اسی سلسلے میں ضلع انتظامیہ، پولیس، ٹرانسپورٹ، صحت، تعلیم، سڑک تعمیراتی محکمہ، بلدیاتی ادارے، اسکول-کالج، رضاکار تنظیمیں اور عام شہریوں کی شراکت سے وسیع پیمانے پر بیداری مہم اور حساسیت کی ورکشاپس منعقد کی جا رہی ہیں۔انہوں نے کہا کہ سڑک تحفظ کے پانچ بنیادی اجزا محفوظ ٹریفک رویہ، حادثے کے بعد نگہداشت، سڑک تحفظ کا انتظام، محفوظ سڑکوں کی تعمیر اور محفوظ گاڑیوں کی تیاری۔ ان سب کو یقینی بنانا ہم سب کی مشترکہ ذمہ داری ہے۔ انہوں نے شہریوں سے اپیل کی کہ وہ ٹریفک قوانین کے ساتھ ساتھ سڑک آداب کی بھی پابندی کریں، پیدل چلنے والوں اور سائیکل سواروں کا احترام کریں اور ایمرجنسی گاڑیوں کو راستہ دیں۔ضلع مجسٹریٹ نے تیز رفتاری، اوورلوڈنگ، بغیر ہیلمٹ اور سیٹ بیلٹ کے گاڑی چلانے، موبائل فون کے استعمال، روڈ ریج اور لاپرواہ ڈرائیونگ سے سختی سے بچنے کا مشورہ دیا۔ انہوں نے کہا کہ انتظامیہ کی جانب سے سی سی ٹی وی اور انٹیگریٹڈ ٹریفک مینجمنٹ سسٹم کے ذریعے قوانین کی خلاف ورزی پر سخت کارروائی کی جا رہی ہے۔ پٹنہ اسمارٹ سٹی لمیٹڈ کی جانب سے ضلع کے تقریباً 415 مقامات پر 3300 سے زائد سی سی ٹی وی کیمرے نصب کیے گئے ہیں، جن کے ذریعے تیز رفتاری، ریڈ لائٹ کی خلاف ورزی اور دیگر خلاف ورزیوں پر نظر رکھی جا رہی ہے۔انہوں نے یہ بھی بتایا کہ سڑک تحفظ ماہ کے دوران حادثات میں زخمیوں کی مدد کرنے والے شہریوں کو اعزاز سے نوازا جائے گا۔