پٹنہ، 13 فروری (اے بی این): وزیر اعلیٰ نتیش کمار نے ریاست میں بند تمام چینی ملوں کو جلد از جلد شروع کرنے کی ہدایت دی ہے۔
وزیر اعلیٰ نتیش کمار نے جمعہ کو ایک انے مارگ واقع سنکلپ سبھاگار میں سات نشچئے پارٹ-3 کے تحت’خوشحال صنعت۔ مضبوط بہار‘کے لیے کیے جا رہے کاموں کا جائزہ لیا۔ محکمہ ٔصنعت کے سکریٹری کندن کمار نے پریزنٹیشن کے ذریعے وزیر اعلیٰ کے سامنے’خوشحال صنعت ۔ مضبوط بہار‘ سے متعلق مختلف نکات پر تفصیلی جانکاری دی۔ محکمہ اطلاعات و ٹیکنالوجی کے سکریٹری ابھے کمار سنگھ اور محکمۂ گناصنعت کے ایڈیشنل چیف سکریٹری کے۔ سینتھل کمار نے اپنے اپنے محکموں کی جانب سے اس منصوبے کے نفاذ کے لیے کیے جا رہے اقدامات سے آگاہ کیا۔محکمۂ گناصنعت کے ایڈیشنل چیف سکریٹری کے۔ سینتھل کمار نے بتایا کہ گوپال گنج ضلع کی ساساموسا چینی مل کو جلد ہی شروع کیا جائے گا۔
جائزہ کے دوران وزیرِ اعلیٰ نے افسران کو ہدایت دی کہ ریاست میں جو بھی چینی ملیں بند ہیں، انہیں فوری طور پر دوبارہ شروع کرایا جائے۔ انہوں نے کہا کہ ریاست میں مغربی چمپارن ضلع کی چنپٹیا، مشرقی چمپارن ضلع کی باراچکیا اور موتیہاری، گوپال گنج ضلع کی ساساموسا، سارن ضلع کی مڑھورا، مظفرپور ضلع کی موتی پور، سمستی پور ضلع کی سمستی پور اور دربھنگہ ضلع کی سکری اورریام چینی ملیں بند ہیں۔ انہوں نے کہا کہ ساساموسا چینی مل کو جلد شروع کیا جا رہا ہے۔
وزیر اعلیٰ نتیش کمار نے ہدایت دی کہ سات نشچئے پارٹ۔3 کے تحت ' خوشحال صنعت ۔ مضبو ط بہار 'منصوبے کا نفاذ درست طریقے سے اور تیزی کے ساتھ مکمل کیا جائے۔ انہوں نے کہا کہ پرانی بند چینی ملوں کے دوبارہ آغاز سے کسانوں کو بڑا فائدہ ہوگا اور روزگار کے مواقع بھی پیدا ہوں گے۔ انہوں نے یہ بھی ہدایت دی کہ ریاست میں نئی چینی ملوں کے قیام کے لیے بھی موثر کارروائی یقینی بنائی جائے۔ بہار کو ملک کی پانچ ترقی یافتہ ریاستوں میں شامل کرنے کے لیے ایکشن پلان کے ساتھ مرحلہ وار طریقے سے کام کیا جائے۔
جائزہ اجلاس میں وزیرِ اعلیٰ کے پرنسپل سکریٹری دیپک کمار، ڈیولپمنٹ کمشنر میہر کمار سنگھ، محکمۂ ریونیو و لینڈ ریفارمز کے پرنسپل سکریٹری سی۔کے۔ انل، محکمۂ اطلاعات و ٹیکنالوجی کے سکریٹری ابھے کمار سنگھ، محکمۂ صنعت کے سکریٹری کندن کمار، وزیر اعلیٰ کے سکریٹری کمار روی، ڈاکٹر چندرشیکھر سنگھ، کوآپریٹیو محکمہ کے سکریٹری دھرمندر سنگھ سمیت دیگر سینئر افسران موجود تھے۔