پٹنہ، 04 فروری (اے بی این) نائب وزیر اعلیٰ اور وزیر داخلہ سمراٹ چودھری نے بدھ کو ہدایت جاری کی ہے کہ طالبات کی حفاظت کے پیش نظر ریاست کے تمام گرلز ہاسٹلز میں 24 گھنٹے خاتون وارڈن کی موجودگی لازمی ہوگی۔
مسٹر چودھری نے آج جاری اپنے بیان میں کہا کہ سماج کی ترقی اور خواتین کو بااختیار بنانے کے لیے لڑکیوں اور خواتین کا تعلیم یافتہ اور خود کفیل ہونا نہایت ضروری ہے۔ انہوں نے کہا کہ بہار حکومت خواتین کی ترقی کے لیے مسلسل کام کر رہی ہے۔ حکومت کا ماننا ہے کہ خواتین کو اسکول، کالج، کام کی جگہ اور رہائشی مقامات پر محفوظ ماحول ملنا چاہیے۔ خواتین کو مساوی مواقع اور احترام کے ساتھ زندگی گزارنے کے حق میں کسی قسم کی رکاوٹ نہ آئے، اس کے لیے محکمہ داخلہ کی جانب سے ضروری ہدایات جاری کی گئی ہیں۔
نائب وزیر اعلیٰ سمراٹ چودھری نے کہا کہ ریاست بھر میں چل رہے گرلز ہاسٹلز اور لاج کے لیے نئے رہنما خطوط جاری کیے گئے ہیں۔ انہوں نے کہا کہ اب ہر گرلز ہاسٹل اور لاج کا رجسٹریشن لازمی ہوگا۔ ہر تھانے میں موجود تمام ہاسٹلز کا مکمل ریکارڈ رکھا جائے گا، تاکہ ضرورت پڑنے پر فوری طور پر جانکاری مل جا سکے۔ اس کی ذمہ داری خواتین ہیلپ ڈیسک کو سونپی گئی ہے۔ مسٹر چودھری نے کہا کہ تمام ہاسٹلز میں 24 گھنٹے خاتون وارڈن کی موجودگی ضروری ہوگی۔ اس کے علاوہ وارڈن، گارڈ، باورچی اور صفائی کارکن سمیت تمام ملازمین کی پولیس تصدیق لازمی قرار دی گئی ہے۔ انہوں نے کہا کہ سکیورٹی کے لیے ہاسٹل کے مرکزی دروازے، راہداریوں، کھانے کے مقامات اور پورے احاطے میں سی سی ٹی وی کیمرے نصب کیے جائیں گے، جن کی ریکارڈنگ کم از کم 30 دن تک محفوظ رکھی جائے گی۔ انہوں نے بتایا کہ ہاسٹلز میں مناسب روشنی، بہتر صفائی کا انتظام، مضبوط دروازے اور تالے، اور کھڑکیوں میں لوہے کی جالیاں ہونا لازمی ہوگا۔
نائب وزیر اعلیٰ نے کہا کہ ہاسٹل میں آنے والے ہر شخص کا نام اور موبائل نمبر، آدھار نمبر کے ساتھ وزیٹر رجسٹر میں درج کیا جائے گا۔ رہائشی کمروں کے حصے میں مردوں کا داخلہ مکمل طور پر ممنوع ہوگا۔ رات کے وقت طالبات اور اسٹاف کی موجودگی کو یقینی بنانے کے لیے بایومیٹرک سسٹم لگانے پر بھی زور دیا گیا ہے۔ انہوں نے کہا کہ ہنگامی حالات سے نمٹنے کے لیے ہاسٹلز میں مقامی تھانے، خواتین ہیلپ ڈیسک، ابھیہ بریگیڈ اور 112 نمبر سے متعلق معلوماتی پوسٹر آویزاں کیے جائیں گے۔ طالبات کو 112 انڈیا ایپ کے سکیورٹی فیچرز کے بارے میں بھی آگاہ کیا جائے گا۔
مسٹر چودھری نے کہا کہ پولیس، خواتین ہیلپ ڈیسک اور ابھیہ بریگیڈ مل کر ہاسٹلز کی باقاعدہ جانچ کریں گے۔ کسی بھی مشتبہ یا مجرمانہ سرگرمی کی اطلاع ملنے پر فوری کارروائی کی جائے گی۔ انہوں نے واضح کیا کہ بچیوں کی حفاظت پر کوئی سمجھوتہ نہیں کیا جائے گا اور ان تمام ہدایات پر سختی سے عمل درآمد کرایا جائے گا۔