بہار کی صنعت کاری کو رفتار دینے اور سرمایہ کاروں کے لیے راہیں آسان کرنے کے لیے چیف سکریٹری پرتیئے امرت کی صدارت میں ’انڈسٹری ڈائیلاگ‘ منعقد ہوا۔ پٹنہ ہوائی اڈے کے قریب ایوی ایشن آرگنائزیشن ڈائریکٹوریٹ میں چیف سکریٹری نے صنعت کے نمائندوں سے براہ راست بات چیت کی اور انہیں واضح طور پر ہدایت دی کہ وہ بہار میں صنعتوں کے قیام کی راہ میں حائل رکاوٹوں کو دور کرنےمیں ترجیح دیں۔ افسران کو سخت ہدایات دیتے ہوئے چیف سکریٹری نے کہا کہ ریاستی حکومت صنعتوں کو فروغ دینے کے لئے پابند عہد ہے۔ انہوں نے متعلقہ محکموں کو ہدایت دی کہ ادائیگی اور صنعت کے قیام سے متعلق مسائل کو فوری طور پر حل کیا جائے۔ دیپک کمار نے ’دی فوڈ اسٹیپس آف بدھ کوریڈور‘ کی ترقی کی تجویز پیش کی، جس کا مقصد بھگوان بدھ کے سفر، تبلیغ کے مقامات، اور ان کی والدہ کے آخری ایام راجگیر، بودھ گیا، اور دیگر سے وابستہ گاؤں کو جوڑنے کا منصوبہ ہے۔ انہوں نے اچھی سڑکوں کی تعمیر پر بھی زور دیا۔ اسے اہم بتاتے ہوئے چیف سکریٹری نے افسران کو ضروری جانکاری حاصل کرنے اور رپورٹ پیش کرنے کی ہدایت دی۔ ’ایم بی اے مکھانہ والا‘ کے سی ای او شرون کمار رائے نے پٹنہ میں ایک مستقل آؤٹ لیٹ اور گنگا پتھ پر مکھانہ پر مبنی صحت بخش کھانے کی مصنوعات ڈوسا، کوکیز وغیرہ کے لیے ایک اسٹال کی درخواست کی۔ مکھانہ کو بہار کا "سپر فوڈ" قرار دیتے ہوئے چیف سکریٹری نے پٹنہ ڈسٹرکٹ مجسٹریٹ کو ہدایت دی کہ وہ کاروباری کو ہر ممکن مدد فراہم کریں۔ پیلیڈیم انڈیا کے سی ای او امیت پتجوشی نے ’کو-ڈیزاسٹر مینجمنٹ پروگرام‘ کے تحت بہار کو آفات سے پاک بنانے کی تجویز پیش کی اور انہیں ڈیزاسٹر مینجمنٹ ڈیپارٹمنٹ کے سربراہ سے ملاقات کرنے کا مشورہ دیا گیا۔ارمن انٹرنیشنل کے سی ای او ارون کمار سنگھ نے ایک ’انٹیگریٹڈ ایگری انرجی انٹرپرائز پروگرام‘ کا مشورہ دیا۔ چیف سیکرٹری نے اس اقدام کو سراہا اور ذاتی طور پر اس کا جائزہ لینے کا یقین دلایا۔غیر ملکی سرمایہ کاروں کی سہولت کو مدنظر رکھتے ہوئے اس میٹنگ کا اہتمام پٹنہ ہوائی اڈے کے قریب کیا گیا تھا۔ میٹنگ میں کل 14 سرمایہ کاروں اور صنعت کے نمائندوں نے اے آئی ، آکسیجن پلانٹ، شوگر مل اور فائنانس وغیرہ سے متعلق اپنی تجاویز اور مسائل پیش کیے۔اس موقع پر گنے کی صنعت کے محکمہ کے ایڈیشنل چیف سکریٹری کے سینتھل کمار، شوگر کین کمشنر انیل کمار جھا، سکریٹری انیل کمار، صنعت محکمہ کے سکریٹری کندن کمار، ڈائریکٹر مکل کمار گپتا، توانائی محکمہ کے سکریٹری منوج کمار سنگھ اور ایس بی آئی کے نمائندہ موجود تھے۔