پٹنہ، 3 جنوری (اے بی این) جنتا دل یونائیٹڈ (جے ڈی یو) کی ریاستی ترجمان انجم آرا نے سنیچر کوکہا کہ وزیر اعلیٰ نتیش کمار کی دور اندیش پالیسیوں کی بدولت دبئی میں منعقد ہونے والے گلف فوڈ فیسٹیول میں بہار کے جی آئی ٹیگ یافتہ مصنوعات اپنی منفرد شناخت اور اعلیٰ معیار کے ساتھ دنیا کے سامنے پیش کیے جائیں گے۔
محترمہ انجم آرا نے آج ایک بیان جاری کرتے ہوئے کہا کہ وزیر اعلیٰ مسٹر کمار کی کوششوں سے بہار کی خوشحال زرعی پیداوار، روایتی غذائی مصنوعات اور ثقافتی وراثت کو اب عالمی سطح پر نئی پہچان مل رہی ہے۔ یہ بہار کے کسانوں، کاریگروں اور روایتی صنعت کاروں کے لیے ایک تاریخی موقع ہے۔
جے ڈی یو کی ترجمان نے بتایا کہ اس بین الاقوامی فوڈ فیسٹیول میں سلاؤ کا کھاجا، متھلا کا مکھانا، بھاگلپور کا کترنی چاول اور مرچا دھان کی نمائش کی جائے گی۔ خاص بات یہ ہے کہ مٹھائیوں کے زمرے میں بہار سے صرف سلاؤکے کھاجا کو ہی جی آئی ٹیگ حاصل ہے، اسی وجہ سے اسے خصوصی طور پر منتخب کیا گیا ہے۔ اس سے واضح ہوتا ہے کہ بہار کی روایتی مصنوعات اب معیار اور شناخت کے عالمی پیمانوں پر پوری اتر رہی ہیں۔ محترمہ انجم آرا نے کہا کہ زرعی اور عمل شدہ غذائی مصنوعات ایکسپورٹ ڈیولپمنٹ اتھارٹی کے تعاون سے منعقد اس پروگرام کا مقصد جی آئی ٹیگ یافتہ مصنوعات کی برآمدات کو فروغ دینا اور بین الاقوامی بازار میں ان کی مانگ کو مضبوط کرنا ہے۔ اس سے نہ صرف بہار کی مصنوعات کو نئی منڈیاں حاصل ہوں گی بلکہ اس کا براہ راست فائدہ ریاست کے کسانوں، کاریگروں اور چھوٹے پروڈیوسرز تک پہنچے گا۔
جے ڈی یو کی ترجمان نے کہا کہ یہ پہل بہار کی ثقافتی شناخت کو عالمی سطح پر مستحکم کرنے کی سمت ایک اہم قدم ہے۔ شاہی لیچی، زردالو آم، کترنی، مرچا چاول، متھلا مکھانا، سلاؤ کا کھاجا، مگہی پان، بھاگلپور سلک، مدھوبنی پینٹنگ، سجنی کڑھائی، سکّی اور منجوشا فن نیز کھٹوا فن جیسے جی آئی ٹیگ یافتہ مصنوعات پہلے ہی بہار کی منفرد شناخت بن چکے ہیں۔ ان مصنوعات کے باعث نہ صرف بازار کی قدر میں اضافہ ہوا ہے بلکہ روایتی ہنر کو بھی وقار اور پائیداری حاصل ہوئی ہے۔
جے ڈی یو کی رہنما نے کہا کہ ریاست میں وزیر اعلیٰ مسٹر کمار کی حکومت اور مرکزی حکومت کی مشترکہ کوششوں سے بہار کی مصنوعات کو عالمی پلیٹ فارم پر مسلسل نئی بلندیوں تک پہنچایا جا رہا ہے۔ یہ کامیابی بہار کے خود کفیل مستقبل کی سمت ایک مضبوط قدم ہے، جہاں کسان اور کاریگر عالمی منڈی کا حصہ بن کر خوشحالی کی جانب گامزن ہوں گے۔