پٹنہ، 02 مارچ (اے بی این): نائب وزیر اعلیٰ سمراٹ چودھری نے گیا ضلع کے گروابلاک میں شہید صوبیدار سنتوش کمار کی اہلیہ مسزکنک کماری کو ایک ایکڑ بندوبست زمین کے کاغذات سونپ دیے۔
یہ زمین پریاسرکل کے موضع منجھیاواں، تھانہ نمبر 126، کھاتہ نمبر 331 اور کھسرا نمبر 2340 میں واقع ہے، جس کا رقبہ 1.00 ایکڑ ہے۔
نائب وزیر اعلیٰ سمراٹ چودھری نے پیرکو کہا کہ شہید صوبیدار سنتوش کمار نے مادر وطن کے دفاع میں اپنی اعلیٰ ترین قربانی دی۔ انہوں نے کہا کہ قومی جمہوری اتحاد (این ڈی اے) حکومت شہداءکی قربانیوں کو سلام پیش کرتی ہے اور ان کے اہل خانہ کے ساتھ مضبوطی سے کھڑی ہے۔ انہوں نے کہا کہ قربانی دینے والوں کے خوابوں کو پورا کرنا ہی سچی خراج عقیدت ہے۔
سمراٹ چودھری نے کہا کہ ان کے والد بھی فوجی تھے اور انہوں نے ملک کی حفاظت کے لیے تین جنگیں لڑی ہیں۔ انہوں نے کہا کہ وہ فوجی خاندانوں کی قربانی اور ایثار کو بخوبی سمجھتے ہیں۔ انہوں نے مزید کہا کہ بہار اور دہلی میں این ڈی اے کی حکومتیں شہید خاندانوں کے احترام اور تعاون کے لیے پرعزم ہیں۔
قابل ذکر ہے کہ سمراٹ چودھری نے حال ہی میں اموکھر میں واقع شہید صوبیدار سنتوش کمار کے مجسمے کی نقاب کشائی کے موقع پر شہید کے اہل خانہ کو زمین دینے کا وعدہ کیا تھا، جسے آج پورا کر دیا گیا۔ صوبیدار سنتوش کمار فروری 2025 میں لیہہ۔لداخ میں ہونے والے ایک بم دھماکے میں شہید ہو گئے تھے۔
نائب وزیر اعلیٰ سمراٹ چودھری نے کہا کہ ریاستی حکومت شہداءکے اہل خانہ کی دیکھ بھال کے لیے پوری طرح پرعزم ہے۔