بہار کے وزیراعلی سمراٹ چودھری نے بدھ کو چیف منسٹر سیکریٹریٹ کے واقع 'سنواد ہال میں محکمہ زراعت کی جانب سے منعقدہ پروگرام میں اگست 2026 کے آخری ہفتے میں شدید بارش اور مختلف ندیوں کی سطحِ آب میں غیر متوقع اضافے کی وجہ سے آئے سیلاب سے فصل کے نقصان کا سامنا کرنے والے 248704 کسانوں کے بینک کھاتوں میں زرعی ان پٹ گرانٹ اسکیم کے تحت ڈی بی ٹی کے ذریعے 112.52 کروڑ روپے کی رقم منتقل کی۔
اس موقع پر وزیراعلی چودھری نے بتایا کہ کسانوں کو بحران کے وقت مدد پہنچانا ریاستی حکومت کی ترجیح ہے۔ قدرتی آفت سے متاثرہ کسانوں کو راحت فراہم کرنے کے لیے حکومت پورے عزم کے ساتھ کام کر رہی ہے۔ انہوں نے بتایا کہ حکومت کی کوشش ہے کہ متاثرہ کسانوں کو وقت پر فصل کے نقصان کی مالی امداد ملے، جس سے وہ کھیتی باڑی کے کاموں کو آگے بڑھا سکیں۔ انہوں نے ہدایت دی کہ دسہرے کے بعد 22 اکتوبر سے خصوصی مہم چلا کر یہ یقینی بنائیں کہ سیلاب سے جن کسانوں کو فصل کا نقصان ہوا ہے، انہیں بھی گرانٹ کی رقم فراہم کی جائے، کوئی بھی آفت متاثرہ کسان اس سے محروم نہ رہے۔
وزیراعلی نے بتایا کہ زرعی ان پٹ گرانٹ اسکیم کے تحت غیر سیراب شدہ فصل کے رقبے کے لیے 8500 روپے فی ہیکٹر، سیراب شدہ رقبے کے لیے 17000 روپے فی ہیکٹر نیز بارہ ماہی فصلوں کے لیے 22500 روپے فی ہیکٹر کے طور پر کسانوں کو گرانٹ دی جاتی ہے۔ انہوں نے بتایا کہ زرعی ان پٹ گرانٹ کے ذریعے کسانوں کو فصل کے نقصان کے بعد کھیتی کے لیے ضروری وسائل اکٹھا کرنے میں مدد ملے گی۔