پٹنہ، 03 مارچ (اے بی این) بھارتیہ جنتا پارٹی (بی جے پی) نے منگل کو بہار سے راجیہ سبھا انتخابات کے لیے پارٹی کے قومی صدر نتن نبین اور شیویش کمار کے ناموں کا امیدوار کے طور پر اعلان کر دیا ہے۔ بی جے پی کے قومی جنرل سکریٹری اور ہیڈکوارٹر انچارج ارون سنگھ نے ایک پریس ریلیز جاری کرتے ہوئے بتایا کہ پارٹی نے بہار سے نتن نبین اور شیویش کمار سمیت آسام، چھتیس گڑھ، ہریانہ، اوڈیشہ اور مغربی بنگال سے کل 10 امیدواروں کے ناموں کی منظوری دی ہے۔ انہوں نے کہا کہ ان مجوزہ ناموں کو پارٹی کی مرکزی انتخابی کمیٹی نے منظوری فراہم کر دی ہے۔
نتن نبین بہار کی بانکی پور اسمبلی سیٹ سے چار بار رکن اسمبلی رہ چکے ہیں اور وزیر اعلیٰ نتیش کمار کی حکومت میں وزیر کے طور پر بھی اپنی خدمات انجام دے چکے ہیں۔ بی جے پی پارلیمانی بورڈ نے 14 دسمبر کو انہیں پارٹی کا قومی ایگزیکٹیو صدر مقرر کیا تھا۔ اس کے بعد جنوری میں وہ بلا مقابلہ بی جے پی کے قومی صدر منتخب ہوئے۔
قابل ذکر ہے کہ بہار سے راجیہ سبھا کے پانچ اراکین کی میعاد اپریل میں ختم ہو رہی ہے۔ ان میں قومی جمہوری اتحاد (این ڈی اے) کے تین اور راشٹریہ جنتا دل (آر جے ڈی) کے دو اراکین شامل ہیں۔ جن اراکین کی میعاد ختم ہو رہی ہے ان میں جنتا دل یونائیٹڈ (جے ڈی یو) کے ہری ونش نارائن سنگھ اور رامناتھ ٹھاکر، راشٹریہ لوک مورچہ (آر ایل ایم) کے صدر اپیندر کشواہا اور آر جے ڈی کے امریندر دھاری سنگھ اور پریم چند گپتا شامل ہیں۔
بہار اسمبلی میں ارکان کی کل تعداد 243 ہے اور راجیہ سبھا کی ایک نشست جیتنے کے لیے 41 ارکان اسمبلی کی حمایت ضروری ہوتی ہے۔ موجودہ وقت میں این ڈی اے کے پاس 202 ارکان اسمبلی کی حمایت حاصل ہے، جس کی بنیاد پر وہ چار نشستیں آسانی سے جیت سکتی ہے۔ دوسری جانب مہاگٹھ بندھن کی کل تعداد 35 ہے، جس میں آر جے ڈی کے 25 ارکان اسمبلی شامل ہیں۔ موجودہ منظرنامے میں آر جے ڈی کو کامیابی کے لیے آل انڈیا مجلس اتحاد المسلمین (اے آئی ایم آئی ایم) کے پانچ ارکان اسمبلی اور بہوجن سماج پارٹی (بی ایس پی) کے ایک رکن اسمبلی کی حمایت درکار ہوگی۔
الیکشن کمیشن آف انڈیا کی جانب سے جاری پروگرام کے مطابق نامزدگی داخل کرنے کی آخری تاریخ پانچ مارچ مقرر کی گئی ہے۔ 16 مارچ کو ووٹنگ ہوگی۔ ووٹنگ کے اختتام کے فوراً بعد ووٹوں کی گنتی کی جائے گی اور اسی دن نتائج کا اعلان کر دیا جائے گا۔