پٹنہ، 9 جنوری بہار بھارتیہ جنتا پارٹی (بی جے پی) کے صدر سنجے سراؤگی نے 'زمین کے بدلے نوکری گھوٹالہ معاملے میں دہلی کی خصوصی سی بی آئی عدالت کی جانب سے راشٹریہ جنتا دل (آر جے ڈی) کے صدر اور سابق ریلوے وزیر لالو پرساد یادو اور ان کے اہل خانہ کے خلاف الزامات طے کیے جانے کے بعد کہا کہ لالو یادو خاندان کے جرائم کی فہرست دن بہ دن طویل ہوتی جا رہی ہے۔
مسٹرسراؤگی نے جاری اپنے بیان میں کہا کہ قانون کے ہاتھ لمبے ہوتے ہیں۔ ملک میں قانون سب سے بڑا ہے اور جن لوگوں نے بھی بدعنوانی کی ہے، ان کے خلاف قانون اپنا کام کر رہا ہے۔ انہوں نے کہا کہ بدعنوانی اور گھوٹالوں کے معاملات میں عدالت مقررہ قوانین کے مطابق الزامات طے کرے گی اور مناسب فیصلہ سنائے گی۔
بی جے پی کے ریاستی صدر نے کہا کہ زمین کے بدلے نوکری کے معاملے میں عدالت نے بھی اس بات کو تسلیم کیا ہے کہ ایک وسیع مجرمانہ سازش کے تحت اس جرم کو انجام دیا گیا۔ انہوں نے کہا کہ 15 سال کے 'جنگل راج کے دوران بہار میں کئی بڑے گھوٹالے ہوئے، جن کے نتیجے میں لالو خاندان کو ہزاروں کروڑ روپے کا فائدہ ہوا اور بہار ترقی کے معاملے میں مزید پچھڑتا چلا گیا۔ انہوں نے کہا کہ ان گھوٹالوں کے سبب بہار کی کافی بدنامی ہوئی۔ریلوے وزیر کے طور پر اپنے دور اقتدار میں لالو یادو نے جو گھوٹالے کیے، وہ قومی سطح کے تھے اور اس کے علاوہ بہار میں بھی ان لوگوں نے کئی گھوٹالوں کو انجام دیا۔ مسٹر سراؤگی نے کہا کہ عدالت نے اس بات کو بھی تسلیم کیا ہے کہ لالو یادو کا پورا خاندان ایک سیاسی۔مجرمانہ سنڈیکیٹ چلاتا ہے۔ انہوں نے الزام لگایا کہ اس خاندان نے سیاست کو بے پناہ دولت کمانے کا ذریعہ سمجھ کر استعمال کیا اور بہار کے سرکاری خزانے کو لوٹ کر اپنی جائیداد بنائی۔ انہوں نے کہا کہ گزشتہ انتخابات میں بہار کی عوام نے واضح پیغام دے دیا تھا کہ 'جنگل راج قائم کرنے والی بدعنوان پارٹی اور خاندان کو اب مزید برداشت نہیں کیا جائے گا۔ انہوں نے کہا کہ یہ پہلا موقع نہیں ہے، اس سے قبل بھی لالو یادو چارہ گھوٹالہ میں سزا پا چکے ہیں۔