پٹنہ، 15 مارچ (اےبی این ) نائب وزیر اعلیٰ اور محکمہ ریونیو اور لینڈ ریفارمز کے وزیروجے کمار سنہا نے اتوار کو کہا کہ مصنوعی ذہانت (اے آئی) ٹیکنالوجی کے استعمال سے ریاست میں زمینی سروے اور بندوبست کے کام کو زیادہ شفاف، تیز اور قابل اعتماد بنایا جائے گا۔
مسٹر سنہا نے کہا کہ جدید ٹکنالوجی کو اپنا کر ریونیو ایڈمنسٹریشن کو مضبوط کیا جا رہا ہے جس سے عام شہریوں کو زمین سے متعلق معاملات میں آسان، تیز اور بہتر خدمات حاصل ہو سکیں گی۔ انہوں نے یقین ظاہر کیا کہ اے آئی پر مبنی طریقہ کار سے محکمہ کی کارکردگی میں اضافہ ہوگا اور سروے کا کام مقررہ مدت میں مکمل کیا جاسکے گا۔ریاست میں ریونیو ایڈمنسٹریشن کو جدید، زیادہ موثر اور بروقت تکمیل کو یقینی بنانے کی سمت میں اب خصوصی سروے اور سیٹلمنٹ کے کام میں بھی اے آئی کو استعمال کیا جائے گا۔ اس سلسلے میں ڈائریکٹوریٹ آف لینڈ ریکارڈ اینڈ سروے نے ریاست کے تمام سیٹلمنٹ افسران کو ضروری ہدایات جاری کی ہیں۔ڈائریکٹوریٹ کے ڈائریکٹر، سُہرش بھگت کی طرف سے جاری کردہ ایک خط کے مطابق، اضلاع کے بندوبست کے دفاتر میں اے آئی سیل تشکیل دیا جائے گا، جو خصوصی سروے اور سیٹلمنٹ پروگرام میں اے آئی کے ممکنہ استعمال پر کام کرے گا۔ اس سیل کی صدارت سیٹلمنٹ آفیسر کریں گے، جب کہ اس میں آئی ٹی مینیجر، اسپیشل سروے اسسٹنٹ سیٹلمنٹ آفیسر (آئی ٹی/انجینئرنگ)، اسپیشل سروے قانون گو اور اسپیشل سروے امین بطور ممبر ہوں گے۔
ہدایات کے مطابق، اے آئی سیل ہر ہفتہ کو دوپہر 3:00 بجے سے شام 5:00 بجے تک سیٹلمنٹ آفس میں میٹنگ کرے گا۔ یہ کمیٹی ضلعی سطح پر اے آئی کے استعمال سے متعلق فیصلے کرنے، اہلکاروں کو ٹریننگ کے لیے نامزد کرنے اور اے آئی کورسز کو نافذ کرنے کی ذمہ دار ہوگی۔ تربیت مکمل کرنے والے اہلکاروں کو امتحان کے بعد سرٹیفکیٹ بھی دیا جائے گا۔
خط میں کہا گیا ہے کہ یکم اپریل 2026 سے بندوبست کے کاموں میں اے آئی پر مبنی ٹولز کے ابتدائی استعمال کا ہدف رکھا گیا ہے۔ اس کے لیے متعلقہ اہلکاروں میں بیداری بڑھانے اور ضروری تربیت فراہم کرنے پر زور دیا گیا ہے۔ڈائریکٹوریٹ نے یہ بھی واضح کیا کہ حکومت ہند کے ذریعہ قائم کردہ انڈیا اے آئی مشن اور ریاست میں جاری بہار اے آئی مشن کے مطابق ریونیو انتظامیہ کو زیادہ شفاف، موثر اور ٹیکنالوجی پر مبنی بنانے کے لیے یہ اقدام کیا جا رہا ہے۔ اے آئی کے استعمال سے کام میں تیزی، فیصلہ سازی میں بہتری اور ممکنہ غلطیوں یا بے ضابطگیوں کی نشاندہی کرنا آسان ہوگا۔